Семейліктер Арыс қаласының тұрғындарына көмек көрсетуді жалғастыруда. Осы орайда өңірдің кәсіпкерлері де қол ұшын созудан шет қалмады. Екі жергілікті құс фабрикасы зардап шеккен қалаға жалпы сомасы 15 млн. теңгені құрайтын 20 тонна тауық етін жіберді.
— Баршаңызға белгілі, Арыс қаласында орын алған жағдайға байланысты елімізде шұғыл шаралар қабылданған болатын. Облыс көлемінде Аймақ басшысы Даниал Кенжетайұлы Ахметовтің төра-ғалығымен арнайы штаб құрылды. Штаб жұмысы аясында күнделікті Арыс қаласына көрсетіліп жатқан көмектің мөлшері, алғашқы тұтынымдағы тауалардың көлемі жөніндегі есеп жүргізіліп жатыр. Бүгін Семей қаласындағы «Ардагер» корпорациясы басшылығының мұрындық болуымен 15 млн. теңгенің көмегі көрсетіліп, 20 тонна құс еті тиелген жүк көлігі жолға шықты. 2 мың шақырым қашықтықты еңсеріп, Арыс қаласындағы ағайын-туысқанға Семейдің ыстық сәлемін жеткізеді деген үмітпен сәт сапар тілейміз. Осы орайда қайырымдылық жасаған ел азаматтарына зор ризашылығымыз бен алғысымызды білдіреміз. Біз Арыстағы ағайынмен біргеміз!- деді қала әкімінің орынбасары Айдар Садырбаев.
— Арыс қаласындағы тұрғындарға көмек көрсету туралы шешімді ұжым болып бір ауыздан қабылдадық, — деді «Шығыс бройлер» құс фабрикасының директоры Амандос Нәлібаев. — Осындай қиын сәтте отандастарымызға қолдау білдіру арқылы ынтымағы жарасқан ел екендігімізді дәлелдейміз. Біз Арыспен біргеміз!
Айта кетейік, жүк 3 күннен кейін Арыс қаласына жеткізілетін болады.
Семей қаласының Ақпараттық орталығы.{jcomments off}