Шығыс Қазақстан облысының әкімі Даниал Ахметов Тарбағатай ауданында болып, Елеке сазы қорымындағы археологиялық жұмыстардың барысымен танысты.
Ақсуат ауылында жергілікті жұртшылық өкілдерімен, жастармен кездесуде облыс басшысы осы жолғы сапарынан алған әсерімен бөлісті. Елеке сазы қорымынан белгілі археолог Зейнолла Самашевтың жетекшілігімен ғалымдар тапқан «Алтын адам», басқа да жәдігерлер біздің дәуірімізге дейінгі сегізінші, жетінші ғасырлардағы ерте сақ кезеңінде адам қолымен жасалған дүниелер екенін атап айтты.
-Киелі Тарбағатай жерінде біздің ата-бабаларымыз жердің қасиетін, кен байыту ісін біліп, алтынды бөліп алуда соншалықты шеберлік көрсеткен. Қазір онда ғалымдарымыз ғылыми-зерттеу жұмыстарын жалғастырып жатыр.
Елеке сазына барып тағы бір қуанғаным, мыңғырған көп малымыз бар. Қазақстанның байлығы — малы. Ол еңбекпен келеді. Тек қана еңбек, білім жетістікке жеткізеді. Балаларымызды соған үйретуіміз керек. Тек біздің облысымызда ғана барлық мектептерде балаларға арналған тегін IT-сыныптар ашылған. Балаларымыз үш тілді білуі тиіс. Елбасымыз айтып жүргендей, бәсекеге қабілетті халық болуымыз керек.
Көпбалалы аналар – елдің мақтанышы, балалар – елдің болашағы екенін айтқан аймақ басшысы Елбасы Н.Назарбаевтың, Президентіміз Қасымжомарт Тоқаевтың тапсырмасы бойынша көп балалы аналарды тұрғын үймен қамтамасыз ету жұмыстары қолға алынғанын, біздің облысымызда қазірдің өзінде 230 көп балалы анаға тұрғын үй берілгенін мәлімдеді. Облысымызда көпбалалы отбасылардан шыққан балаларды колледждерде тегін оқыту, балабақшаға тегін қабылдауға мүмкіндік жасалып отырғанын, сонымен қатар оларға тегін түрде мектеп формасын беру қарастырылып жатқанын айтты.
Кездесудің соңында облыс әкімі Даниал Ахметов көпбалалы аналар Балжан Сейлханова, Айман Мархабаева, Әсел Рахметова, Әсел Кәдірбекқызы, Мейрамгүл Шайзадина, Мейрамгүл Көшқалиева, Гүлжанат Қалабаева және Базаргүл Тохтарханға тұрғын үйдің кілтін тапсырды.
Жиыннан соң Даниал Ахметов Тарбағатай ауданының әкімі Серікқазы Садуақасов, аудандық мәслихаттың хатшысы Сәумен Жақаевпен ауданның бірқатар орындарында болды. Аудандық аурухананы аралап, бас дәрігер Алмагүл Әштаевамен, дәрігерлермен әңгімелесті. Емдеу мекемесіне қойылған жаңа қондырғылардың жұмысымен танысты. Облыс басшысы сонымен қатар Ырғызбай Досханаұлы атындағы орталық стадионда болып, бұқаралық спорттың ауылды жердегі даму көрсеткіштері жайлы аудандық денешынықтыру және спорт бөлімінің басшысы Сержан Омарғазинмен әңгімелесті.
Хамза СӘТИЕВ, «Семей таңы».{jcomments off}
