Семей қаласының іргесінде орын тепкен Бобровка кентіндегі әлеуметтік мәселелер біртіндеп шешімін табуда. Жергілікті атқарушы биліктің күш салуымен осыған дейін аталмыш аумақтағы мектеп, жол қатынасы реттеліп, бір қалыпқа келтірілген болатын. Дегенмен жергілікті тұрғындар санының жыл санап артуына байланысты мұндағы бірқатар мәселелер әлі де болса өзекті болып отыр. Соның ішінде Бобровка кентін ауыз сумен қамтамасыз ету ісі күн тәртібінде тұр.
Осыдан біраз уақыт бұрын Семей қаласының әкімі Ермак Сәлімовтің әлеуметтік желідегі парақшасына Бобровка кентінің тұрғындары өздерін толғандыратын мәселелер туралы жазып, арнайы өтініш қалдырған болатын. Міне, аталған мәселелер қатарын басты назарға алған Ермак Бидахметұлы өткен сенбі күні Бобровка кентінің тұрғындарымен арнайы кез-десті.
Жиын барысында кент тұрғындары шаһар басшысына өз өтініштерін жеткізді. Соның ішіндегі аса өзектісі ауыз су мәселесі екен. Бірнеше жылдан бері таза судың тапшылығын көріп келе жатқан тұрғындар қала әкіміне осы мәселені қолға алуын өтінді.
Тұрғындар тілегін толық тыңдап шыққан қала әкімі:
— Қазіргі күні жалпы Семей қаласы бойынша бір емес, бірнеше елді мекен ауыз сумен қамтамасыз етілмеген. Алайда бүгінде бұл бағытта жұмыстарды қолға алудың нәтижесінде қалаға қарасты көптеген аудандар сумен де, жарықпен де толық қамтылып отыр. Енді, міне, кезек Бобровка кентіне де келді. Кенттің жағдайымен толық таныспын. Мәселелер қатары толықтай менің бақылауымда. Ауыз су бойынша жобалық-сметалық құжаттарды жасап, арнайы қаражат қарастырып, келесі жылы толық ауыз сумен қамтамасыз ететін боламыз. Арнайы су құбырлары үйлеріңіздің алдына дейін тартылатын болады. Мәселе шешілгенше көше бойындағы су колонкалары қосылып тұрады. Ал жарық мәселесіне келсек, мамандар әр үйдің жарығының қуаттылығын тексеріп, қосымша жарық трансформаторлары қойылады, — деді өз сөзінде қала әкімі Ермак Бидахметұлы.
Кездесу еркін форматта өрбігендіктен, кент тұрғындары көкейлерінде жүрген ой-пікірлерімен де бөлісті. Бұл ретте кент тұрғындарын толғандыратын тағы бір мәселе қоғамдық көліктің әсіресе демалыс күндері және кешкі мезгілде тым сирек қатынауы екен.
— Алдағы уақытта жаңа автобустар жүре бастайды. Халыққа қолайлы болуы үшін бұл автобустар қысқы, жазғы ауысым деп бөлінбей, жұмыс кестесіне сәйкес, таңертеңнен кешке дейін жүретін болады, — деді бұл сауалға жауап қайырған қала әкімі.
Қазіргі күні қаланың аталмыш ауданына №№ 40, 9, 48 және қысқы мезгілде №18 бағытты автобустар тұрақты түрде қатынайды. Ал мектеп оқушылары үшін арнайы көлік бөлінген. Балалардың мектепке баруы қалалық білім бөлімінің ұдайы қадағалауында. Бұл тарапта айтарлықтай мәселе жоқ.
Мұнымен қоса Ермак Сәлімов осынау сапары барысында кенттегі тазалық жұмыстарымен де танысты. Бүгінде көптеген тұрғындар тазалық жұмыстарын бірлесіп өткізуге, келісімшарт жасауға асықпайтын көрінеді. Осы ретте қала әкімі қызмет көрсету мекемесіне және учаскелік полиция қызметкерлеріне айналаны қоқыстан тазарту жұмыстарын ұйымдастыруды қолға алу жөнінде арнайы тапсырма берді.
Өз тілшіміз, «Семей таңы»{jcomments off}