Апта сәрсенбісінде қалалық әкімдікте шаһар басшысы Ермак Сәлімовтің қаладағы учаскелік инспекторлармен кездесуі болып өтті. Қала ішіндегі санитарлық тазалық мәселесі, қоқыс шығару және қоқыс тасымалдаушы мекемелермен келісімшартқа отырмаған тұрғындармен түсіндіру жұмыстарын жүргізу жиынның басты тақырыбы болды. Семей қаласының әкімі Ермак Сәлімов учаскелік полиция инспекторларының жұмысын сынға алды.
Қала әкімі Ермак Бидахметұлы кіріспе сөзінде аталмыш мәселе бойынша қаламыздағы тәртіп сақшыларының жұмысына көңілі толмайтынын жеткізді. Тұрғындар тарапынан да тұрғын үйлер аумағының тазалығын қадағалау жұмыстарының нашар екенін айтып шағымданушылар көп екен. Әсіресе әлеуметтік желілердегі жазбаларға сүйенетін болсақ, қаланың кейбір көшелері мен жекелеген аудандарында учаскелік инспекторлар жүргізуге тиіс жұмыстар жеткілікті екенін аңғаруға болады. Бұл ретте бірінші кезекте жауапкершілік тек тұрғындарға ғана емес, жергілікті полиция қызметкерлеріне де жүктеледі. Қазіргі күні полиция қызметкерлері қоқыс мәселесін ретке келтіру үшін республикалық тазалық акциясы аясында көп шаралар атқаруға міндетті. Жиын барысында бірінші кезекте осы бағыттағы жұмыстарды жүргізу реті пысықталды.
Қала әкімі учаскелік полицейлерге қоқыс шығару үшін арнайы мекемелермен келісімшарт жасаспаған тұрғындарды анықтап, бұл келеңсіздікті жоюға күш салуды тапсырды. Сонымен қатар кейбір көп қабатты үйлердегі тұрғындар санын нақтылаудың да маңыздылығын айтты.
Семей қалалық ішкі істер басқармасының қызметкерлері қоғам арасында ұсақ заң бұзушылықтарға деген «нөлдік төзімділік» принципін қалыптастыруға жұмыс жасап жатқандарын айтады. Жүргізіліп жатқан профилактикалық шаралардың ішінде полиция қызметкерлері, қоғамдық орындармен бірге, тұрғын үйлер аумағындағы тазалық пен тәртіптің сақталуына ерекше көңіл аударуда. Ағымдағы жылдың басынан бері абаттандыру ережелерін бұзған көптеген жеке және заңды тұлғалар әкімшілік жауапкершілікке тартылған. Жергілікті полиция қызметкерлері сонымен қатар жекелеген мекемелердің қоқысты уақтылы шығаруын да басты назарға алған. Әйтсе де бұл тарапта әлі де атқарылуы тиіс жұмыстар аз емес.
Семей қалалық ТҮКШ бөлімі мамандарының айтуынша, қазіргі күні қала халқының тек 30 пайызы ғана қоқыс шығаруға келісімшартқа отырған. Және де бұл келісімдерде үйдегі тұрғындар саны біршама азайтылып көрсетілген.
Мұндай мәселелер жеке кәсіп иелері арасында да бар. Кейбір бизнес өкілдері қоқыс контейнерін жай көз қылып қана орнатқан. Кейбірі келісімшартқа отырмағандықтан, тұрмыстық қалдықтарды іргелес көп қабатты үйлердің ауласындағы қоқыс контейнеріне апарып тастайды. Ал мұндай жағдай қоқыс тасымалдаушылардың жұмысын біршама күрделендіретіні белгілі. Бұл жайында қоқыс шығарумен айналысатын мекемелердің өкілдері мәлімдеді.
Өкінішке орай, мұндай жағдай қаламызда жиі орын алуда. Осы ретте қала әкімі өзге де коммуналдық қызмет өкілдерімен, сервистік орталықтар қызметкерлерімен бірлесіп жұмыс жүргізуді міндеттеді. Сонымен қоса әлеуметтік желідегі тұрғындардың жазбаларын да ұдайы назарда ұстап отыруды қатаң тапсырды.
Ал келісімшарты жоқ тұрғындарға алдымен қатаң ескерту жасалынып, егер одан нәтиже шықпайтын болса, заңға сәйкес әкімшілік жауапқа тарту қарастырылуы тиіс.
Алдағы уақытта қаланың санитарлық тазалығын ретке келтіруге қатысты жиындар тағы да ұйымдастырылмақ. Бір аптадан кейін учаскелік инспекторлар қала басшысының алдында қабылданған шаралар туралы есеп береді.
Жанат ПЕРНЕБЕК, «Семей таңы» {jcomments off}
