Хакім Абайдың 175 жылдық мерейтойы қарсаңында Нұр-Сұлтан қаласы әкімдігінің қолдауымен «Ұлы Абайдың ізімен: рухани сапар» тақырыбымен ғылыми-танымдық экспедиция ұйымдастырылған болатын. Экспедиция аясында ел астанасы — Нұр-Сұлтан қаласынан шыққан топ Қарқаралыда, Абыралы мен Қайнарда және Қарауылда болды. Ақшоқы мен Бөріліге де аялдап, өткен жексенбіде Семей қаласына келіп жетті.
Шаһарымызға ат басын тіреген мәртебелі меймандар ең алдымен Абай ескерткішіне барды, ақын рухына тағзым етіп, гүл шоқтарын қойды. Осыдан соң Абай атындағы облыстық кітапханада ұйымдастырылған ғылыми-танымдық конференцияға қатысып, дөңгелек үстел басында келелі әңгіме қозғады.
Айта кетсек,экспедиция құрамында есімдері елге танымал азаматтар — Омар Жалел, Марат Әбсемет, Сұлтан-Хан Аққұлұлы, Алмахан Мұхаметқалиқызы сынды 20-ға жуық абайтанушы-ғалымдар бар екен. Сонымен қатар ынталы топтың құрамында астаналық суретшілер мен танымал блогерлер, ақындар мен журналистер қауымы да болды.
Кітапхана фойесінде қонақтар құрметіне және қала жұртшылығына арналып кітап көрмесі ұйымдастырылыпты. Оған, негізінен, заманында Абай оқыған тарихи кітаптар қойылған екен. Меймандар ең алдымен көрмедегі кітаптармен танысты.
Дөңгелек үстелге қала әкімінің орынбасары Айдар Садырбаев, жергілікті зиялы қауым өкілдері, ақын-жазушылар, абайтанушы ғалымдар мен БАҚ өкілдері қатысты. Конференция барысында қонақтар ақынның 175 жылдық мерейтойына орай ұйымдастырылған экспедицияның мақсаты туралы айтып өтті. Аталмыш шара аясында арнайы бейнефильм әзірленбек. Сонымен қатар Абайдың ізі қалған жерлер бейнеленген туындылар да жинақталатын болады. Бұл ретте топ құрамындағы дарынды суретші Алмас Сырғабай экспедиция мүшелері жүріп өткен жерлердің барлығын дерлік өз туындыларына арқау етіпті.
Меймандар сонымен қатар Абай шығармашылығын насихаттау, оның 175 жылдық мерейтойын өз мәнінде атап өту туралы ойларын ортаға салды.
Кездесу соңында делегация мүшелері Абай атындағы облыстық кітапхана қорына Әлихан Бөкейхановтың 15 томдық шығармалар жинағын естелік ретінде сыйға тартты. Үлкен ризашылықтарын білдірген кітапхана қызметкерлері бұл жаңа кітаптар кітапхана қорында сақталып, алдағы уақыттарда міндетті түрде өз оқырманын табатынын айтты.
Азамат ЕРСАЙЫН, «Семей таңы»{jcomments off}
