Жыл сайын ел көлемінде өткізілетін «Мектепке жол» республикалық қайырымдылық акциясы Семей қаласында да ұйымдастырылуда. 2019-2020 оқу жылында көмекке мұқтаж отбасынан шыққан балаларды әлеуметтік көмекпен қамту мақсатында қаламыздағы «Жанұя» қоғамдық қоры жаны жомарт меценат азаматтармен бірлесіп балақайларға оқу құралдарын тарту етті.
Абай кітапханасында өткен шараға қаламыздағы мектеп жасындағы балғындар мен олардың аналары жиналды. Қайырымдылық акциясына сонымен қатар меценаттар да келген екен.
Қайырымдылық шарасының беташар рәсімінде «Жанұя» ҚҚ-ның атқарушы директоры Людмила Асташкина лебізін білдірді.
– Қайырымдылық — адамгершілік қасиет. Бүгін біз балаларды мектепке, алдағы жаңа оқу жылына даярлауға жиналып отырмыз. Оларға рюкзактар, кеңсе заттары мен өзге де оқу құралдарын табыс ететін боламыз, – деді өз сөзінде Людмила Асташкина.
Айта кетсек, көпбалалы және аз қамтылған отбасылардан шыққан балаларға көмектесуге қаламыздағы бірқатар іргелі фирмалар мен кәсіпорындар басшылары ынта білдіріпті. Олардың ішінде «Шүлбі су электр станциясы» ЖШС, Семей цемент зауыты» ЖШС, «Ақ тілек» қоғамдық қоры, «Семей машина құрастыру зауыты» АҚ сынды тағы да басқа көптеген мекемелер мен ұйымдар ерекше белсенділік танытыпты. Сонымен қатар аталмыш шараға жекелеген азаматтар да қатысыпты.
Сыйлық алған балақайлар қуаныштарын жасыра алмады. Көпшілігі қолдарына тиген оқу құралдарын сол заматта қарап, арқаларына асып алып жатты. Ал аналары мен қамқоршылары осынау іс-шараны ұйымдастырушылар мен қайырымды азаматтарға алғыстарын жаудырды.
Сөз соңында айта кетсек, аталмыш қайырымдылық акциясы қыркүйек айының соңында аяқталады. Акцияның мақсаты – аз қамтылған және көпбалалы отбасылардан шыққан, сондай-ақ жетім балалар мен ата-анасының қамқорлығынсыз қалған балаларға жаңа оқу жылына дайындық кезеңінде көмек көрсету. Шілде айында басталған бұл акция қала мектептерінде де өткізілуде.
Өз тілшіміз
