Ұлы Абайдың туған күніне орай, шаһардың зиялы қауымы Абай ескерткіші алдында ақын рухына тағзым етіп, гүл шоқтарын қойды. Шара аясында Шәкәрім университеті мен Абайдың «Жидебай-Бөрілі» мемлекеттік қорық музейінің ұйымдастыруымен «Абай жылы – оқу жылының» ашылу салтанаты өтті.
Қазақ жазба әдебиетінің негізін қалаушы, данышпан ақын, ұлы ойшыл Абай Құнанбайұлының туғанына биыл 174 жыл толып отыр. Абай ескерткіші маңына жиналған қауым хакім өлеңдерімен сусындап, Абай театры мен Әміре Қашаубаев атындағы филармония өнерпаздарының өнерін тамашалады. ҚР Суретшілер одағының мүшесі, Қазақстан Аннимациялық киносы ассоциациясының президенті Сәлімғали Мырзашев, мәдениет саласының еңбек сіңірген қайраткері, ақын, сазгер, әнші Естай Әлікеев де осы жиынға қатысты.
— Ардақты ағайын, қымбатты жерлестер! Ұлы Абайды ұлықтаған мәртебелі әлеумет. Бүгін біз дәстүр бойынша ұлы бабамызға тағзым жасау үшін арнайы жиналып отырмыз. Хакім сөзін қазақтың бойтұмарына балаған Елбасының сенімді серігі, сарабдал саясаткер, Мемлекет басшысы Қасым-Жомарт Кемелұлы Тоқаевтың Жарлығымен алдымыздағы жыл Ұлы Абайдың мерейтойлы жылы болмақ. «Тас түскен жеріне ауыр» дейді дана халқымыз. Семей жері, Абай елі – қазақ руханиятының меккесі. Осы орайда ақиық ақын Мұқағали Мақатаевтың «Семей десе, Абай деп қарайды адам» деген ұлағатты сөзі еріксіз ойға оралады. Олай болса, Абай есімі жүрегіне берік орнаған әр қазақстандық өзінің алдындағы зор жауапкершілікті сезініп, ерлік, өрлік, ар-ұят, аманатқа адалдық сыналар шақта өзінің азаматтығын танытады деп ойлаймын. Абай жылы жаңа оқу жылының басталуымен тұспа-тұс келіп отыр. «Абай жылы – оқу жылы» идеясының авторы — хакімнің немере інісі Шәкәрім бабамыздың есімін абыроймен алып жүрген университет ұжымы. Кейінгі толқын інілердің атынан университет ұжымына, университет ректоры Мейір Ғариполлаұлына зор ризашылығымыз бен шынайы алғысымызды білдіреміз. Абай тойы, халық тойы құтты, берекелі болсын! — деді қала әкімінің орынбасары А.Садырбаев.
Айта кетейік, жуырда Қазақстан Президенті Қасым-Жомарт Тоқаев Абай Құнан-байұлының 175 жылдық мерейтойын жоғары деңгейде мерекелеу туралы Жарлыққа қол қойған еді. Қазір дайындық жұмыстары басталып кетті. Абай шығармаларының халық-аралық тілдердегі сапалы аудармасын баспадан шығарып, хакім мерейтойын ЮНЕСКО мен ТҮРКСОЙ аясында тойлау мәселесі пысықталуда.
— Абайдың 175 жылдығы — шын мәнінде мемлекеттік дәрежедегі үлкен той. Осы тойдың салмағы әсіресе Семей қаласына, Шәкәрім университетіне, Абай мұражайына, Абай ауданына түсетінін барлығымыз жақсы түсінеміз. Абайды құрметтеу қазақты, руханиятты, өркениетті құрметтеу деп білеміз,- деді филология ғылымдарының докторы, профессор Арап Еспенбетов. — Біздің университет көптеген тың бастамаларды қолға алып жүр. Бұл ретте университет ректоры Мейір Ғариполлаұлының еңбегі ұлан-ғайыр. Соның бірі — биыл «Абай жылы – оқу жылы» ұранымен жаңа оқу жылымызды бастағалы тұрмыз. Оқу ісі де, ғылыми зерттеуіміз де, тәрбие жұмысы да Абай ілімі, Абай тағылымы мен мұрасы төңірегінде өрбімек. Бұрын ғалымдар таласып келген Абайдың туған күні ескіше 10 тамыз бүгінгі 23 тамыз екені дәлелденді. Осы даталы күнге орай, қазір университет ректоры Мейір Ғариполлаұлы және оқытушылар құрамы мен студенттер Жидебай басына аттанбақ. Сәт сапар тілейміз,- деді Арап Сіләмұлы.
Гүл шоқтарын қою рәсімінен соң Шәкәрім университеті ұжымы мен ниет білдірген жандар Жидебайға аттанды.
Айтолқын САМАТОВА, «Семей таңы»{jcomments off}
