Семейге Қарағандыдағы Қазақстан халқы Ассамблеясының «Елтану» республикалық ту-ристік-өлкетану экспедициясы келді. «Өз еліңді таны» жобасы аясында ұйымдастырылған экспедиция ұлы ақын Абай Құнанбайұлының 175 жылдық мерейтойына арналып отыр.
Экспедиция құрамында этномәдени бірлестіктер жетекшілері, ғалымдар, ақындар, журналистер, блогерлер, ұстаздар және озат оқушылар — барлығы 23 адам бар. Тағылымы мол экспедицияға Қарағанды облысы әкімі аппаратының «Қоғамдық келісім» КММ директоры Ерлан Құсайын мен Қазақстан халқы Ассамблеясының ғылыми сараптамалық тобының мүшесі Нұрсахан Бейсенбекова жетекшілік етуде.
Бұған дейін Павлодар облысындағы Мәшһүр Жүсіп Көпеевтің, Мұса Шорманұлының кесенесін, Қаныш Сәтбаев мұражайын және тағы да басқа бірқатар тарихи орындарды аралаған экспедиция мүшелері 10 қазан күні Семейге келіп, Абай кітапханасында қаладағы этномәдени бірлестік мүшелерімен, қаланың зиялы қауым өкілдерімен кездесу өткізді. Шығыс Қазақстанға сапарын қонақтар Жидебайда жалғастырып, Абай Құнанбайұлының Жидебай-Бөрілідегі мемлекеттік тарихи-мәдени және әдеби қорық-мұражайына, Құнанбай құдығына, Зере мен Ұлжан зираты сынды қастерлі орындарға ат басын тіреді.
— Облысаралық байланысты нығайту, туған жердің тарихын танып білу мақсатында биылғы жылы экспедицияны Павлодар мен Шығыс Қазақстан облыстарына бағыттап отырмыз. Семей — Алаштың астанасы, тарихы ықылым заманға кететін қасиетті өңір, тарихи қала. Данышпан Абайды, мұхиттай терең ойлы Мұхтарды, ақын, философ Шәкәрімді сыйлаған қала, — деді Қарағанды облысы әкімі аппаратының «Қоғамдық келісім» КММ директоры Ерлан Құсайын.
Қазақстан халқы Ассамблеясы «Рухани жаңғыру» бағдарламасы аясында үлкен жобаларды жүзеге асырып келеді. Елбасына ҚХА сессиясында таныстырылған «Қазақтану» мәдени-ағартушылық жобасы, «Елтану» мәдени-танымдық экспедициясы да осы бағдарламаның аясында жүзеге асырылып жатыр.
— Біз өткен жылы облыстық Ассамблея тарапынан үш жүздің басын қосқан қасиетті Ұлытауда «Ұлы дала елі» мәдени экспедициясын ұйымдастырдық. Балқашты, Алаштың үш бірдей алыбы шыққан Ақтоғай ауданын, ел арасында Көмекей әулие атанған, Абылай ханның ақылшысы болған Бұқар жырау атын иеленген ауданды, Арқаны, Қарқаралыны аралап, өлкенің тарихымен таныстық. Экспедицияның мақсаты — әуле-әнбиелердің басын аралау ғана емес, жастарды туған жердің тарихымен таныстырып, отансүйгіштік сезімдерін жетілдіру. Экспедиция құрамында әр ұлт өкілдерінен құралған жастар көп. Олар қазақ тілін жетік меңгерген Абай, Шәкәрім оқуларының жеңімпаздары,- дейді Қарағанды облысы әкімі аппаратының «Қоғамдық келісім» КММ директоры Ерлан Құсайын.
Іссапар соңында экспедиция жайлы жинақ пен фотоальбом шығарылып, телевизиялық бағдарлама түсірілмек.
Жадыра ТӨЛЕГЕНҚЫЗЫ, «Семей таңы»{jcomments off}
