Семей қаласындағы физика-математика бағытындағы Назарбаев Зияткерлік мектебінің информатика пәні мұғалімі Бақытбек Орынбаев пен оқушылар Мирас Мұратқанов, Нұрбол Мақтаев домбырада күй тартатын роботты құрастырды. Өнертапқыштар бұл еңбектерін хакім Абайдың 175 жылдығына арнап отыр.
– Әр оқу жылы басталарда алдымызға мақсат қоямыз. Ортақ ойымыз — жаңа бір туындыны жасап, құрастыру арқылы мектеп оқушыларын шығармашылыққа баулу, олардың қызығушылығын арттыру. Роботқа домбырамен күй тарттыру идеясы біраз уақыт ойда жүрді. Сәті биыл түсіп, жобаны жүзеге асыруға кірістік, оған толық 1 ай жұмсадық. Алдымен роботты құрастырдық, содан соң олардың пернені басушы, ішекті қағушы сияқты әрбір бөліктерін жеке-жеке жасадық, – дейді зияткерлік мектеп мұғалімі, жоба жетекшісі Бақытбек Нұрлыбекұлы.
Күйші роботты құрастырушылардың сөзіне қарағанд{jcomments off}а, бұған дейін осыған ұқсасы болған. Тек ол бір күйді орындаумен ғана шектелетін. Ал мына жаңа құрылғы домбырадағы барлық пернені еркін басып, ішекті қалауынша қаға алу артықшылығына ие. Ал егер күйді орындауда қателіктер болса, онда пропорционалды дифференциалдаушы реттегіш арқылы өзі есептеп, реттеп отырады.
Робот домбырада күйді компьютерге енгізілген ноталар арқылы орындайды. Құрастырушылар күйдің орындалу жылдамдығын да қалауынша өзгертулеріне қол жеткізген. Қазірдің өзінде робот дана Абайдың «Торжорға» күйі мен халық әні «Еркем-айды» орындай алады. Ұстаз бен шәкірттер өз туындыларының кез келген шығарманы нота арқылы орындауға қауқарлы екеніне сенімді.
Естеріңізге салсақ, Бақыт-бек Нұрлыбекұлы бұған дейін 2018 жылдың түлегі Әділ Ордаев есімді оқушысымен бірлесіп құлтемірге «қара жорғаны» билеткен еді. Енді, міне, тағы бір тың жаңалығымен жұртшылықты таңғалдыруда.
Назарбаев Зияткерлік мектебінің баспасөз қызметі
