Қазақ батыр қызға да, ақын қызға да, әнші — биші, өнерлі қыздарға да бай. «Мен қазақ қыздарына қайран қалам» деп ақын ағаларымыздың бекерге жырламағаны сондықтан болар. Сол сияқты кез келген ер адам көтере бермейтін ауыр зілтемірлерді төбесіне көтеретін нәзікжандылар да аз емес қазақта. Сондай-ақ, басқасын айтпағанда, ерлер атқаратын жұмыстардың қатарына жататын күзет саласында қызмет істеп жүрген қаракөздерімізді де ұшырастырып, таң тамаша болып жатамыз. Дәл сондай нәзікжанды күзетшілердің бірі апалы-сіңілі Әсия және Әсимамен сұхбаттасудың реті келген еді.
Әсия мен Әсима егіз. Оларды екі бөлек жан демесеңіз, түр-тұлғалары мен мінез-құлықтары, тіпті, дауыстарына дейін қатты ұқсастықты бай-қайсыз. Зер салып қарамасаңыз оларды ажырату да қиын. Егіз қыздар 1980 жылы Семейде дүниеге келген. Екеуінің арасы 5-ақ минут екен. 5 минутқа ғана үлкен болса да Әсия сіңлісіне әркез қорған болып келеді. Кейіннен біраз жыл бөлек тұрғандары болмаса, егіз қыздар бала күндерінен бері жұптары жазылмаған. Олар бір-бірінсіз тұра алмайтындарын айтады. Тіпті, бірі сәл сырқаттанып қалса, екіншісі де ауырып қалатын көрінеді. Семейдегі №2 мектепте оқыған қыздар мектеп бітірісімен екеуі де аспаздық білім алған. Дегенмен, олар аспаз болуды емес, күзетшілік мамандықты таңдаған. Жеті жылдан бері күзет саласында еңбек етіп жүрген қыздар қаладағы сауда орталықтарының бірінің қауіпсіздігін бақылауда. Олардың міндеті сауда орталығындағы тауарлардың қолды болмауын әрі қызметкерлердің қауіпсіздігін күзету. Кезінде бір әйел адамның ұрлық жасап, қашып бара жатқанын байқап қалған күзетші қыздар қылмыскерді оқиға орынында дереу құрықтаған. «Әйел адам қанша рет қашпақшы болып қарсылық көрсеткенімен, жедел топ келгенше ұрлықшыны ұстап тұрдық», — дейді олар. Олардың айтуынша, мұндай оқиға бір рет қана емес, талай мәрте қайталанған. Бірақ, қырағы қыздар үнемі ұрлықшылардың жолын кесіп отырған. «Бізге қорқуға болмайды. Себебі, қаншама қымбат дүниелерді сеніп тапсырады», — дейді егіз-дер. Басшылық тарапынан да үнемі қолдау көрсетіп, оларды қанаттандырып отырады екен. Екеуі де басшыларына ерекше ризашылықтарын білдірді. өздеріне күзет саласы қатты ұнаса керек. Болашақта осы сала бойынша жұмыстарын жалғастыра бермек. Алайда, қос қыз да бала күндерінде дәрігер болуды армандаған екен. Әрине, күзетке ер адамның өзін дене бітіміне, батылдығына қарай таңдайтыны белгілі. Ендеше, егіз қыздар да күзет саласында бекерге жұмыс істемесе керек. Әсима Жұмаханова «Айкидо», «Қолды жекпе-жек» сияқты спорт түрлерімен айналыс-қан.
{jcomments on}Әсия Зияданова да спорттан бейхабар емес көрінеді. Ол да сіңлісінен қалмай, үнемі жаттығу жасап жүрген. Олардың екеуі де батыл әрі өжет. Жұмыста қатал болғанымен, өмірде көңілді, ақжарқын ашық мінезді жандар. Жұмыстан тыс уақытта оларды күзетші деп мүлдем елестете де алмайсыз. Естуімізше, әулеттерінде Әсия мен Әсима ғана күзетші емес. Олардың нағашы әпкелері Жанат Оспанова да талай жылдан бері біршама мекемелердің күзет саласында еңбек еткен. Әпкелерінің жолын қуған егіздер де ұлағатты отбасында бала өсіріп, тағылымды тәрбие беруде. Әсияның Алмаз бен Малика есімді балалары бар. жұбайы Ерболатпен отасқандарына 14 жыл болған. Ал, Әсиманың ұлы Арман 11 жаста. Каратэ спорт түрімен айналысады. Додалы жарыстарда жеткен жетістіктері де жоқ емес. «Болашақта отанын қорғайтын азамат болғысы келеді», — дейді анасы. Балалары Семейдегі №34 мектепте білім алуда. Ал, аналары жұмыста болған уақытта олар-ға әжелері, яғни, егіз қыздың анасы Алтынай Мағзұмқызы бас-көз болуда. Алтынай Мағзұмқызының бары да, нары да егіз қыздары мен немерелері. Барлығы бір шаңырақ астында тату-тәтті өмір сүруде. Барлық мерекелерді отбасымен тойлағанды жақсы көретіндіктерін айтады күзетші арулар. Айтуларынша, 8 Наурыз – Халықаралық Әйелдер күні мерекесі — бұл отбасының ең сүйікті мерекесі. Айтулы мерекеге егіз қыздар қызу дайындық үстінде. «Барлық әйелдер қауымын, аналар мен аруларды келе жатқан мерекелерімен құттықтаймыз. Жұмыстары табысты болсын. Барша әріптес- теріміздің істеріне сәттілік тілейміз», — деген тілектерін білдірді. Біз де оларды төл мерекелерімен құттықтай отырып, еңбектеріне жеміс тілейміз.
Нұрдәулет КӘКІШЕВ,
«Семей таңы»
