Семей қаласы әкімдігінің бөлім басшылары түрмеге экскурсияға барып қайтты. Мемлекеттік қызметшілер ең қауіпсіз саналатын колонияда болып, сотталғандардың өмірімен танысты. Бұл шара сыбайлас жемқорлыққа қарсы агенттік өкілдері тарапынан шенеуніктерге сыбайлас жемқорлық құқық бұзушылықтарының салдарын көзбен көрсету мақсатында ұйымдастырылды. Агенттік өкілдерінің пікірінше, қылмыстың алдын алудың ең тиімді тәсілі – қызметкерлерді бас бостандығынан айыру орындарына апару тәжірибесі.
— Біздің мақсатымыз — болашақта сыбайлас жемқорлық әрекеттеріне бармауы үшін мемлекеттік қызметшілерге аталған қылмыстың салдарын көрсету, оларды тұтқындардың тұрмысымен таныстыру арқылы бүгінгі өмірін, отбасылары мен жұмысын, яғни барды бағалай білу керектігіне көздерін жеткізу,- дейді Қазақстан Республикасы Сыбайлас жемқорлыққа қарсы іс-қимыл агенттігінің Шығыс Қазақстан облысы бойынша департаментінің басшысы Ренат Набиев.
Мемлекеттік қызметшілер асхана, спортзал, кітапхана және басқа да бөлмелерді аралап көріп, колониядағы тұрмыс-тіршілікпен танысты, бір кездері сүрініп кетіп, қазір мерзімін өтеп жатқан жандармен сөйлесті.
Мен жас мемлекеттік қызметкерлерге сыбайлас жемқорлық әрекеттерінен аулақ болып, этиканы сақтап, заңға бағыну қажеттігін айтқым келеді. Әркім өз ісін жақсы білуі керек. Мен адвокат болып жұмыс істедім. Бір кездері жаза бастым, бопсалаушылық үшін сегіз жылға сотталдым. Осында отырғаныма биыл үшінші жыл. Әрине, өте қиын, бостандық бәрінен қымбат. Кеш болса да, өкінемін. Сондықтан мен мемлекеттік қызметшілерді заңға қарсы әрекеттерге бармауға шақырғым келеді,- деді түрмедегілердің бірі.
Сыбайлас жемқорлықтың алдын алуға және жолын кесуге бағытталған осындай іс-шаралар алдағы уақытта да өткізіле бермек.
Семей қаласының ақпараттық орталығы{jcomments off}