Биыл Қазақстан халқы Ассамблеясының құрылғанына 25 жыл толады. Осы уақыт ішінде Ассамблея бір шаңырақтың астында тұратын 130-дан астам түрлі этнос өкілдерін біріктіре білді. Бүгінгі күні Шығыс Қазақстан облысы Қазақстан халқы Ассамблеясының еріктілері аймақ тұрғындарына көмектесу үшін бірігіп отыр.
Шығыс Қазақстан Достық үйі — Қоғамдық келісім орталығы директорының орынбасары Равиль Юнусовтың айтуынша, еріктілер Өскемен мен Семейде шектеу шаралары енгізілген алғашқы күндерден бастап жұмысқа кіріскен.
— Қазақстан халқы Ассамблеясы ел Президенті Қасым-Жомарт Тоқаевтың 2020 жылды Еріктілер жылы деп жариялауына алғашқылардың бірі болып үн қатты. Қазір бәріміз үшін қиын кезең. Еріктілер ретінде біз де халыққа қолдау көрсетуден тыс қала алмадық. Сондықтан біз қарттарға, халықтың әлеуметтік әлсіз топтарына азық-түлік, дәрі-дәрмек жеткіземіз, басқа да көмек көрсетеміз, — дейді Равиль Юнусов.
Шығыс Қазақстан облысы Қазақстан халқы Ассамблеясының еріктілері мен жастар сонымен қатар Абай Құнанбаевтың 175 жылдығын тойлауға байланысты іс-шараларға дайындық жұмыстарын да белсенді жүргізуде.
ШҚО ақпараттық орталығы{jcomments off}
