Қазақстан Республикасының Президенті Қасым-Жомарт Тоқаевтың еліміз бойынша жарияланған күшейтілген шектеулер жағдайында уақытша жұмысынан айырылғандар мен табысын жоғалтқан азаматтарға әлеуметтік көмек көрсету туралы тапсырмалары Семей қаласы бойынша да тыңғылықты түрде жүзеге асырылуда. Бұл ретте жергілікті тұрғындар арасында түсіндіру, ақпараттандыру шаралары атқарылып, оң нәтижесін беруде.
Атап айтсақ, бүгінгі күнге дейін Семей қаласында 42 500 теңге көлеміндегі әлеуметтік төлемді алуға жергілікті тұрғындардан 8 мыңнан астам өтініш келіп түсіпті. Бұл туралы жуырда қалалық ақпарат орталығында өткен арнайы брифинг барысында қалалық жұмыспен қамту және әлеуметтік бағдарламалар бөлімінің басшысы Мұрат Құржықаев кең көлемде айтып өтті. Бөлім басшысының айтуынша, аталмыш бағытта жүйелі жұмыс жүргізілген.
–Бүгінгі күнге дейін қаламыз бойынша ең төменгі жалақы мөлшеріндегі әлеуметтік төлем алуға 8104 өтініш келіп түсті. Оның 5 307-сі мақұлданса, 2 797 өтінім бойынша жәрдемақы тағайындаудан бас тартылды, негізгі себеп – құжаттарды тапсыру кезінде жіберілген қателіктер. Сондай-ақ төлем алуға құқығы жоқ адамдар да өтініш жіберген, – дейді Семей қаласының жұмыспен қамту және әлеуметтік бағдарламалар бөлімінің басшысы Мұрат Құржықаев.
Оның айтуынша, бүгінде өтініш беру процесі, тіркеу және өтінішті қарау мерзімдері біршама жеңілдетілген. Егер бұрын өтінішті қарау үшін бір апта уақыт қажет болса, қазір оған небары үш күн жетеді.
Сонымен қатар, бір айта кетер жайт, аталмыш көмек түрін алуда біршама мәселелер де туындапты.
– Банктік дербес шоттары жоқ азаматтар үшін бірқатар қиындықтар болғаны рас. Сол себептен де әкімдік барлық банктер мен «Қазпошта» филиалдарының жұмыс кестесіне өзгеріс енгізіп, демалыссыз етіп ұйымдастырды. Осының нәтижесінде шоттарды тез ашуға мүмкіндік жасалды, – дейді бұл ретте түсінік берген бөлім басшысы.
Сонымен қатар семейліктер мемлекет тарапынан берілетін өзге де көмек түрлеріне қол жеткізе алады. Тоқтала кетер болсақ, Семей қаласында 32 мыңнан астам тұрғын коммуналдық шығын үшін берілетін 15 мың теңге өтемақыны алуға құқылы. Естеріңізге сала кетсек, осыған дейін тұтынылған коммуналдық қызметке 15 мың теңге өтемақы алуға өтінім қабылдау арнаулы жүйені іске қосылған соң басталатындығы туралы хабарланған болатын.
Қалалық жұмыспен қамту және әлеуметтік бағдарламалар бөлімінің басшысы Мұрат Құржықаевтың айтуынша, карантин режиміне байланысты коммуналдық шығын үшін берілетін 15 мың теңге көлеміндегі өтемақыны 7 санаттағы азаматтар, нақты айтсақ, I, II және III топтағы мүгедектер, ҰОС мүгедектері мен ардагерлері, ҰОС мүгедектері мен ардагерлеріне теңестірілген тұлғалар, мүгедек балаларды тәрбиелеп отырған отбасылар, көпбалалы жанұялар, ең төменгі зейнетақы алатын зейнеткерлер, мемлекеттік және қоғамдық міндеттерін, әскери қызметін орындау кезінде, ғарышқа ұшуды дайындау немесе жүзеге асыру кезінде, адам өмірін құтқару кезінде, құқық тәртібін қорғау кезінде қаза тапқан адамдардың отбасылары, АӘК алатын азаматтар, оның ішінде жалғыз басты зейнеткерлер де алуға құқылы.
– Қазіргі таңда арнайы тізім жасалды. Қала бойынша жалпы саны 32 мыңнан астам адам бұл көмек түрін алуға толықтай құқылы. Негізгі шарт – олардың жеке баспанасы және қызмет көрсетушілермен келісімшарттары болуы тиіс. Өтінішті ТҮКШ бөліміне беру керек, онда call-орталық жұмыс істейді. Төлемдер тиісті қаражат түскеннен кейін беріле бастайды, – дейді бұл ретте қалалық бөлім басшысы.
Қорыта айтар болсақ, ел Президентінің тапсырмасын орындауда Семей қаласы бойынша нәтижелі жұмыстар атқарылуда. Қазіргі күнде де қалалық әкімдік қызметкерлері тарапынан әлеуметтік көмек тағайындауға байланысты түсіндіру, ақпараттандыру шаралары жүргізіліп жатыр.
Әлібек КЕМЕЛХАН, «Семей таңы»{jcomments off}
