Ұлы Жеңістің 75 жылдығы қарсаңында облыс көлемінде бірқатар шаралар өткізілді. Соның ішінде бірінші кезекте «Ардагерлерді ардақтайық» жобасы аясында «Birgemiz Shygys» қоғамдық қоры арқылы 2982 Ұлы Отан соғысының ардагері мен мүгедегіне және тыл еңбеккерлеріне азық-түлік себеттері тапсырылды. Көптеген мекемелердің басшылары мен өкілдері де соғыс және тыл ардагерлерінің үйлеріне арнайы барып, мейраммен құттықтады.
Сонымен қатар облыс көлемінде тұратын барлық соғыс ардагерлеріне «Nur Otan» партиясынан мерекелік қол сағаттар және ҚР Президенті мен ШҚО әкімінің құттықтау хаттары да табыс етілді.
— Аталмыш акция екі күн бойы өткізілді. Сыйлық Екінші дүниежүзілік соғыстың ардагерлері мен мүгедектеріне, тыл еңбеккерлеріне табысталды. Тізімдерді әлеуметтік қорғау органдары әзірледі. Біз тиісті мекенжайларға барып, сыйлықты тараттық, — дейді бұл ретте аталмыш шаралар жайында түсінік берген «Nur Otan» партиясының Семей қалалық филиалы төрағасының бірінші орынбасары Айнұр Арғынбекова.
Айта кетерлігі, бұл естелік сыйлықтар мен азық-түліктер қоржынын облыстық, қалалық мәслихат депутаттарымен қатар, партияның сайлау органдарының және партиялық кадрлық резерв мүшелері де мереке қарсаңында жеткізіп берді.
Жалпы, бүгінгі таңда облысымыз бойынша Жеңістің 75 жылдығына арналған іс-шаралар уақытша ғана тоқтатылғаны белгілі. Осыған дейін «Мәңгілік полк» шеруінің орнына онлайн-акция өткізу ұсынылған болатын.
— Облыс әкімі Даниал Ахметов осыдан бес ай бұрын Жеңістің 75 жылдығына дайындықты бастауды тапсырған еді. Бірақ іс-шараларды уақытша тоқтатуға тура келді. Еліміз бойынша енгізілген шектеулер аяқталған соң, барлық іс-шаралар қайтадан жалғасады, — дейді облыстық ардагерлер кеңесінің төрағасы Айтқазы Шерубаев.
Аймақтық ардагерлер кеңесі төрағасының айтуынша, облыс көлеміндегі ардагерлер мен тыл еңбеккерлеріне облыстық бюджеттен 900 миллион теңгеден астам қаражат бөлінген. Олардың 80 пайызы Жеңіс күніне дейін белгіленген төлемдерді алып та үлгерді.
Осыған дейін айтып өткеніміздей, Жеңістің 75 жылдығына орай, Ұлы Отан соғысына қатысушылар мен мүгедектерге 600 000 теңге; марапатталған тыл еңбеккерлеріне – 100 000 теңге, марапатталмағандарға 42 500 теңге көлемінде төлемақы беру туралы шешім қабылданған еді. Аталмыш бағыттағы шаралар облыс әкімінің қадағалауында болды.
Ал 9 мамыр күні шектеу салдарынан «Мәңгілік полк» шеруі өткізілген жоқ. Оның орнына облыс тұрғындары майданда болған ата-әжелерінің фотосуреттерін терезеге қойып, сағат 21.00-де шам жағып, сол бір сұрапыл күндерді еске алды.
Әлібек КЕМЕЛХАН, «Семей таңы»{jcomments off}
