Абай Құнанбайұлының 175 жылдық мерейтойына дайындық жұмыстары Семей қаласында қызу қарқынмен жүріп жатыр. Қаладағы ұлы ақын есімін иеленген алаң мен кітапхана, театр мен музей күрделі жөндеуден өтуде. Жаңа мешіт те халық игілігіне осы жылы берілмек.
Хакім мерейтойына орай, қаламыздағы бірнеше нысан жаңа келбетке енбек. Абай алаңы толығымен өзгеріп, аумағы ұлғайтылып, тағы бір субұрқақ салынады. Жиек тастар толығымен жаңартылып, ескі асфальт төсемі мәрмәр тасқа ауыстырылады. Аймақ басшысы Семейге келген сапарында алаңды кеңейту мақсатында Абай ескерткішінің орнын ауыстыруды, өткен жазда қойылған ағаш мүсіндерді алып тастап, балабақшаларға беруді ұсынған болатын. Бүгінде аталған мүсіндер алынып тасталған.
Қазіргі күні Абай театрының сыртқы қаптамасы тарихи қасбеті сақтала отырып жаңартылуда. Көрермендер залындағы жөндеу жұмыстары да аяқталуға жақын. Мұндағы түстердің реңін өзгерту жоспарлануда.
— Театрдың іші мүлдем басқа кейіпке енеді. Екінші қабаттың фойесін де басқаша жасамақшымыз. Көрермендер залы, баспалдақтар қайтадан жаңартылып жатыр. Ұлы Абайдың мерейтойына арналған шарада театр әртістері жаңаланған сахнаға шығады. Сахна сыртына да жөндеу жұмыстары жүргізілуде. Киім ауыстыратын, дайындық бөлмелері, ғимараттың әкімшілік қабаты – бәрі де жөнделеді. Облыс әкімі Даниал Ахметов театр ішіндегі түс пен бояуды таңдауда өте мұқият болуға кеңес берді. Театр аумағын да абаттандырамыз, – дейді театр басшысы Яков Горельников.
Абай музейінің де сыртқы қаптамасы жаңартылуда. 12 жыл бұрын салынған асфальт төсемі ауыстырылады. Облыс әкімі Даниал Ахметовтің тапсырмасымен ғимарат алдына Абай мен ұлдарына арналған жаңа ескерткіш қойылмақ.
Орталық саябақтағы жөндеу жұмыстары да ақын мерейтойына дейін аяқталады деп жоспарлануда. Саябақ іші кеңейіп, заманауи келбетке ие болмақ.
Абай кітапханасында да жөндеу жұмыстары жүргізілуде. Қазір ғимараттың сыртқы келбеті жаңартылуда.
Жадыра ТӨЛЕГЕНҚЫЗЫ, «Семей таңы»{jcomments off}
