Жарма ауданы әкімінің орынбасары Т.Мұратов Шар қаласына арнайы жұмыс сапарымен барып, шаһардағы бірқатар дүкендерді, барлық дәріханаларды және шаштараздарды аралап шықты, кәсіпкерлік нысандардың иелерімен жүздесіп, еліміздегі қазіргі жағдай, карантиндік шектеулер жайлы сөйлесті.
Аудан әкімінің орынбасары аталған елді мекендердегі қауіпсіздік шараларының сақталуын бақылап қайту мақсатында келген еді. Жалпы, баршамызға белгілі, аймақ халқының вирусқа қарсы, ыстық түсіретін препараттарды негізсіз сатып алуына байланысты қазіргі уақытта қажетті препараттардың тапшылығы немесе жеткіліксіздігі пайда болды, ал фармацевтикалық қызметті жүзеге асыратын субъектілер қорларды толықтыруға үлгермейді. Дистрибьюторлардың (көтерме фармацевтикалық компаниялардың) ұсынған ақпараты бойынша, өндірушілерден жоғарыда көрсетілген дәрілік заттар (вирусқа қарсы, ыстықты төмендететін, антибиотиктер) жеткізілмек. Айта кетсек, көтерме фармацевтикалық компаниялар мен дәріханалар, БМСК жанындағы дәріханаларды және емдеу ұйымдарын қоспағанда, жекеменшік ұйымдар болып табылады. Дәріханалар мен дәріхана қоймалары дәрілік заттарды өздерінің жеке қаражаттарына сатып алады және Департаменттің сатып алу бөлігінде олардың кәсіпкерлік қызметіне араласуға құқығы жоқ.
Шығыс Қазақстан облысының тұрғындары, дәрілік заттар мен медициналық бұйымдар айналымы саласындағы субъектілер тарапынан дәрілік заттардың шекті бағаларын көтеру фактілері туындаған жағдайда, ШҚО тауарлар мен қызметтердің сапасы мен қауіпсіздігін бақылау департаментіне телефон шалу арқылы жүгіне алады.
Сонымен қатар, айта кетер тағы бір жайт, коронавирус пандемиясының алдын алу мақсатында өткен аптада облысымыздан тегін маскалар жеткізілген болатын. Бірнеше мәрте қолданылатын бетперделер Жарма ауданының ауылдық округтеріне жолданды. Бүгінгі күні жергілікті елді мекендердегі халықтың осал топтарына — әлеуметтік жағынан аз қамтылған, көп балалы отбасыларға, жалғыз басты қарттарға таратылуда.
Сөз соңында, Жарма ауданының ерікті жастары Қалбатау ауылында карантиндік шектеу шараларына қатысты түсіндіру жұмыстарын жүргізіп жатқанын да айта кетейік. Жергілікті тұрғындардан барлық санитарлық талаптарды қатаң сақтауды сұраймыз. Жақынымызға жанашыр болайық!
Өз тілшіміз{jcomments off}
