Мемлекет басшысы Қасым-Жомарт Кемелұлының тапсырмасы бойынша былтыр Семейді дамытудың 2020-2025 жылдарға арналған кешенді жоспары бекітілгені белгілі. Қалада барлық саланы қамтитын 7 бағыт бойынша 56 жоба жоспарланған. Жобаның іске асырылу барысы туралы онлайн режимде өткен баспасөз конференциясында қала әкімінің орынбасары Қанат Әділбаев толығырақ мәлімет берді.
Жобаларды жалпы қаржыландыру көлемі 260,2 млрд теңгені құрайды. Қала әкімі орынбасарының айтуынша, бұл қаражат көлемі алдағы уақытта тағы да артады. Себебі бағдарламада Қарағайлы ықшам ауданындағы жаңа инновациялық мектеп құрылысының және Знаменка, Қарауыл, Курчатов және басқа да маңызды жолдар қиылысатын Алматы тас жолы бойындағы айналмалы жол құрылысының құны қарастырылмаған. Жобалық-сметалық құжаттамалары келесі жылы дайын болады. Жұмысты бастау 2022 жылға жоспарланған.
— Биылғы жылы кешенді жоспарды іске асыруға 58 млрд теңге бөлінген. Жеті мәдени нысанға, екі әлеуметтік қорғау нысанына және тоғыз білім беру нысанына жөндеу жұмыстары жүргізілді. Соңғы жылдары білім беру нысандарын жөндеуге 1,5 млн теңге қарастырылып келсе, биылғы жылы 1 млрд теңгеден артық қаражат бөлінді. Барлық мектептерде дерлік ағымдағы және күрделі жөндеу жүргізілді,– дейді қала әкімінің орынбасары Қанат Әділбаев.
Кешенді жоспарға сәйкес, Шығыс кентінде 1200 орынға арналған жалпы білім беретін мектеп құрылысы жоспарланған. Сонымен қатар биылғы жылы жаңа радиологиялық орталықты пайдалануға қосу жоспарланған. Жоба құны 6,5 млрд. теңгені құрайды.
Қала әкімі орынбасарының айтуынша, биылғы жылы Семейде 33 көше жөндеуден өткен. Жангелдин көшесінен бастап Омск — Майқапшағай тас жолына дейінгі жол төсемі ауыстырылып, республикалық бюджет есебінен Семей – Қайнар тас жолына орташа жөндеу жұмыстары жүргізілген.
Көшелерді жарықтандыру жұмыстары да атқарылуда. Бүгінгі күні Бозтаев көшесі бойына 484 энергия үнемдейтін шам орнатылды. Тағы 253 шам Қабанбай батыр көшесіне орнатылады. Еуропа қайта құру және даму банкімен ынтымақтаса отырып келесі жылы қала көшелерін жарықтандыру жұмыстарын аяқтау жоспарланып отыр. Аспалы көпір де жарықтандырылады,– деді Қанат Әділбаев.
Конференция соңында қала әкімінің орынбасары барлық жоспарланған жобалар ағымдағы жылдың соңына дейін аяқталатынын атап өтті.{jcomments off}