Шығыс Қазақстан облыстық денсаулық сақтау басқармасына қарасты Семей қаласының Жедел медициналық жәрдем ауруханасында коронавирустық инфекцияны анықтауға арналған ПТР зертханасы ашылды.
Қазіргідей күрделі эпидемиологиялық ахуал қалыптасқан жағдайда аталмыш зертхананың ашылуы тек қалалықтар үшін ғана емес, аталмыш денсаулық сақтау мекемесі үшін де елеулі жаңалық саналады.
Қажетті құрал-жабдықтармен қамтамасыз етілген бұл заманауи зертханада қазіргі таңда арнайы білім алған, біліктілігі жоғары мамандар жұмыс істеуде.
— Аталған зертхананың ашылуы COVID-19-бен күресуде маңызды қадам болып табылады. ПТР тестілеудің көмегімен адам ағзасында вирустың болу, болмауы анықталады және ол диагнозды зертханалық растау үшін қажет. Биоматериал ретінде аңқадан жағынды алынады. Жұмыста заманауи тест жүйелері қолданылады, — дейді бұл орайда пікір білдірген медициналық мекеменің мамандары.
Бір айта кетерлігі, заманауи зертханаға ПТР-диагностикасы әдістерін жан-жақты меңгерген және Германия мен АҚШ-та өндірілген жоғары технологиялық жабдықтармен жұмыс істей білетін тәжірибелі мамандар тартылған.
Ал жаңа зертхананың аурухана жанынан ашылуы ковид сырқатына шалдығушыларды дер кезінде анықтауда берері көп. Бұл орайда дәрігерлердің уақыты мен күш-жігерінің үнемделетінін де айта кету ләзім. Себебі қазіргі таңда сырқаттанып ауруханаға түскендердің барлығы да ПТР тестін тапсыруға міндетті.
Лаборатория тәулік бойы, тіпті демалыс күндері де жұмыс істейді екен. Жаңадан ашылған зертханадағы талдау бағасы да қаламыздағы өзге коммерциялық нысандарға қарағанда біршама төмен екендігін айта кеткен орынды.
Қуаныш ЖОЛЫМБЕТ, «Семей таңы»{jcomments off}