Сенбі, 9 қаңтар күні Тұрғын үй-коммуналдық шаруашылық және тұрғын үй инспекциясы бөлімінің басшысы Амантай Өтелбаев пен «Теплокоммунэнерго» мемлекеттік коммуналдық кәсіпорнының басшысы Расылхан Жолдасов онлайн режимінде өткен баспасөз конференциясында жылу мәселесіне қатысты тұрғындарды толғандырған сауалдарға жауап берді.
Өз сөзінде Амантай Өтелбаев жаңа жылмен қатар басталған аязды күндердегі қаладағы жылу жеткіліксіздігінің негізгі себептерін атап өтті. Бөлім басшысының айтуынша, көптеген үйлердің дайындық төлқұжаттары әлі тапсырылмаған. Сонымен қатар жүйеге заңсыз қосылу да жылу сапасына айтарлықтай әсер етеді. Оның үстіне өткен ғасырдың 80-жылдары салынған қазандықтардың ескіруі де негізгі себептердің бірі болып отыр. Амантай Хайроллаұлы әсіресе қаланың орталық бөлігінде мәселелер бар екенін атап өтті.
— Қалада 18 стандартты жылу көзі бар. Көмірмен байланысты туындаған мәселе жоқ. Барлық тұрғын үйлер мен басқа да нысандар жылумен, суық сумен толығымен қамтамасыз етілген. Егер колонкалар қатып қалса, оларды жылыту бойынша шаралар қабылдаймыз, — деді Амантай Өтелбаев.
Бөлім басшысының сөзінше, жылу жеткіліксіздігінің негізгі себебі — дайындық куәлігін тапсырмау және жылу жүйесіне заңсыз қосылу.
— Жылыту маусымына дейін барлық үй иелері дайындық туралы куәлікті әзірлеуі керек. Барлық көтергіштер жақсы жағдайда болуы тиіс. Бүгінде 1200 төлқұжаттың 450-і ғана тапсырылды. Көп қабатты тұрғын үйлердің шатыры және шатырдағы терезелері жабық, подъезде қос есік болуы керек. Біз, тұрғындардың өтініші бойынша, төтенше шараларды қабылдау үшін тұрғын үйлерді аралаудамыз. Жуырда Дулатов, 135 мекенжайына бардық. Ондағы бір пәтерде жылу бойынша ешқандай мәселе жоқ, бірақ қалған екі пәтер суық. Демек, жылудың таралуы бұзылған, яғни біреулер жылу жүйесіне заңсыз қосылған. Бұл жылу сапасына айтарлықтай әсер етеді. Шығыс, Энергетик кентерінде де осындай заңсыздықтар орын алған, — деді Амантай Өтелбаев.
«Теплокоммунэнерго» МКК басшысы Расылхан Жолдасов оң жағалаудағы жылу тапшылығын сол жағалаудағы артық жылудың есебінен жабу жоспарланып отырғанын атап өтті.
— Барлық қазандықтар жылыту маусымы алдында дайындық сертификаттарын алады. Алайда қазір оң жағалауда жылу жеткіліксіздігі байқалып отыр. Ал сол жағалауда профицит бар. Мұны оң жағалаудағы жылу тапшылығын жабу үшін қолдануға болады,- деп атап өтті Расылхан Жолдасов.
Тікелей эфир барысында қала тұрғындары да сауалдарын қойды.
— Менің ойымша, қаланың 70 пайызы жылумен қамтамасыз етілген. Тек орталықта проблемалар бар. Қазір техникалық параметрлер зерттелуде. Орталықтағы жылу жеткіліксіздігін шешу үшін ескі көпір арқылы сол жағалаудан оң жағалауға құбырлар төселеді. Бүгінгі күні комиссия құрылып, әрбір өтініш қаралуда. Біз тұрғын үйлерді аралаудамыз. Кейбір көтергіштер мен батареялар жарамсыз болып қалған немесе жууды қажет етеді. Бұл мәселені меншік иелері өз бетімен шешуі керек. Біз ұсыныстар береміз, — деді Амантай Өтелбаев.
Расылхан Жолдасовтың айтуынша, қалаға көмір тұрақты түрде жеткізіліп отыр.
— Жылу жетіспеушілігі 35-ші кварталда және қаланың орталық бөлігінде сезіледі. Температура 20 градустан төмендегенде, осы аудандағы нысандар салқындай бастайды. Жылу көздерінде ірі апаттар болған жоқ. Шағын апаттық жағдайларды ретке келтірдік. Меморандумға сәйкес, біз биылғы жылыту маусымына 105 мың тонна көмір алдық. Күн сайын бізге 44 вагон көмір жеткізіледі. Көмір сапасына қатысты шағым жоқ, — деді «Теплокоммунэнерго» МКК басшысы Расылхан Жолдасов.
Жадыра ТӨЛЕГЕНҚЫЗЫ, «Семей таңы»
