Денешынықтыру және сауықтыру кешенінде дзюдодан ҚР Қорғаныс министрінің кубогына арналған әскери сала қызметкерлері мен сарбаздардың қатысуымен ерлер және әйелдер арасында ІІІ республикалық турнир болып өтті.
Байрақты бәсекеге еліміздің барлық аймағынан 38 команда қатысып, бозкілем төрінде 300-ден аса құрыш білекті, апайтөс балуандар өз бақтарын сынады. Спортшылар 8 салмақ дәрежесі бойынша бақ сынап, кіл мықтылардың ішінен кім мықтыны анықтады. Әйелдер арасында 42 келіден бастап 78 келіден жоғары, ал, ерлер арасында 60 келіден бастап 100 келіден жоғары салмаққа дейін белдесіп, бабы келіскендер жеңімпаз атанды, жүлдеге қол созды.
Турнирдің ашылу салтанатында алғаш-қы болып сөз алған Шығыс өңірлік әскери қолбасшылығының қолбасшысы, генерал-майор Мұрат Бектанов жақында ғана қарулы күштердің арасында қазақ күресі спорты түрінен жарыс өткенін тілге тиек етіп, мұндай спорттық сайыстар отан қорғаушылардың патриоттық сезімін одан әрі күшейте түсуге септігін тигізетінін жеткізді.
Одан кейін сөз алған спорт комитетінің төрағасы – ҚР Қорғаныс министрлігінің орталық әскери спорт клубының басшысы, полковник Ерлан Таласбаев ұйым- дастырылып отырған жарыстың жыл сайын ауқымы кеңейіп келе жатқандығын атап өтті.
— Біз үлкен спорт жарысының куәгері болып отырмыз. Биыл үшінші рет дәстүрлі түрде өткізіліп келе жатқан ҚР Қорғаныс министрінің кубогына арналған республикалық турнирдің ауқымы жылдан жылға кеңейіп келеді. Турнирдің барлық ұйымдастырушыларына, Шығыс өңірлік әскери қолбасшылығына және Семей қаласының әкімдігіне ҚР Қорғаныс министрлігінің атынан зор ризашылығымызды білдіреміз. Барлық қатысушы балуандарға сәттілік тілеймін, — дей келе, белдесулердің әділ өтетіндігіне сенім білдірді.
{jcomments on}Сонымен қатар, турнирдің ашылу салтанатына қалалық спорт бөлімінің басшысы Мұрат Құржықаев, облыстық №1 балалар және жасөспірімдер спорт мектебінің директоры, ҚР еңбек сіңірген жаттықтырушысы Мерейғали Көшкінбаев сынды өзге де спорт саласының майталман мамандары қатысты.
Ал, турнирдің бас төрешісі, халықаралық дәрежедегі төреші, ҚР еңбек сіңірген жаттықтырушысы, 2008 жылғы Бейжің олимпиадасының күміс жүлдегері, ел мақтанышы Асхат Жетікеевтің бапкері Жексенбай Саламатов болды.
— Мұндай турнирлер еліміздің сарбаздары үшін өте қажет. Биылғы турнир де өткен жолғылардағыдай жоғары деңгейде өтіп жатыр. Келер жылдары Өзбекстан, Қырғызстан сияқты көршілес елдердің спортшылары қатысады деп жоспарлап отырмыз, — дейді Жексенбай Саламатов.
Екі күнге жалғасқан жарыстың жеңімпаздары мақтау қағаздарымен, медальдармен және бағалы сыйлықтармен марапатталды.
Нұрдәулет КӘКІШЕВ
