Тәуелсіздіктің алғашқы аумалы-төкпелі жылдарында елімізді қиын-қыстау кезеңнен аман алып шығу салмағы Тұңғыш Президентіміз Н.Ә.Назарбаевқа түсті. Осындай сын кезеңде Нұрсұлтан Әбішұлы өтпелі қиындықтарды халықты ауызбіршілікке шақыра отырып, жеңіп шықты. Аз ғана уақыттың ішінде Қазақстанды әлем таныған мемлекеттер қатарына қосуы мықты ерік-жігердің, қажырлы еңбектің, салиқалы саясаттың жемісі екені белгілі.
Ұлт Көшбасшысының ел тізгінін қолға алған кезеңде халқымыз үшін маңызы зор барлық саланың тең дәрежеде дамуына күш салғаны көз алдымызда. Соның ішінде білім саласына деген концептуалды көзқарасы Қазақстанда ғана емес, көптеген елдердің мамандарының мойындауына және қолдауына ие болды.
Біздің ғасыр – білектінің емес, білімдінің ғасыры. Осыны басты ұстанымы санайтын Тұңғыш Президенттің «Назарбаев Зияткерлік мектептері» аталған ХХІ ғасырдың нағыз көшбасшыларын даярлайтын білім ошағын құру туралы идеясының өміршең екендігі қазір дәлелденіп отыр. Бүгінде сан мыңдаған түлекті үлкен өмірге қанаттандырған бұл мектептен әлемдік деңгейлердегі олимпиадалар, ғылыми жобалар, сайыстардың жеңімпаздары мен жүлдегерлері шығып, Қазақстанның абыройын асқақтатып жүр.
Бұрын-соңды қазақ баласының ойына да келмеген дүние жүзінде рейтингтері жоғары Гарвард, Колумбия, Стенфорд, Нью-Йорк сынды университеттеріне, Массачусетс технологиялық институтына әлемдік додада топ жарып түсіп, білім алып жатқан зияткерлік мектептердің түлектері қаншама. Сондай-ақ Ұлыбритания, БАӘ, Қытай, Корея, Жапония сынды әлеуеті күшті мемлекеттерде білімдерін жетілдіріп жатқан жастарымыз да жетерлік. Бұдан бөлек, бүгінгі заман сұранысына жауап бере алатын «Назарбаев Зияткерлік мектептері» ДББҰ оқу-тәрбие бағдарламасын кезең-кезеңімен отандық орта білім беретін мектептерге енгізу жұмыстары да өз жемісін беріп келеді. Осының барлығы Елбасымыздың келешекті кең ойлап, ертеңгі күнге жасаған бағыт-бағдары.
Ал жерімізде 40 жыл қырғын салған Кеңестік дәуірдің сарқыны Семей сынақ полигонын түбегейлі жабу туралы Жарлығы бізді ғана емес, Жер шары тұрғындарының алғысына бөленген сәт болды.
Ардагерлер, халық қалаулылары, мәдениет, білім және өзге сала өкілдерінің бастамасымен Семейдегі көрікті Қарағайлы ауданындағы жаңа көшеге Нұрсұлтан Назарбаевтың есімін беру туралы бастама көтерілді. Бұл бастама жерлестеріміздің Ұлт Көшбасшысының еңбегіне көрсетілген құрметі деп білеміз.
Дәл осы Қарағайлы ауданындағы Назарбаев Зияткерлік мектебінде аймақтың әр қиырынан іріктелген білімге құштар ұл-қыздарымыз тәлім-тәрбие алып жатыр. Олар Тұңғыш Президентіміздің өскелең ұрпақтың бәсекеге қабілетті, білімді де тәрбиелі болып қалыптасуларына барлық жағдайды жасап отырғанын жақсы біледі. Н.Ә.Назарбаевқа қарап бой түзейді. Енді олар Елбасы атындағы даңғылмен Елбасы атындағы мектепке келетіндіктерін жауапкершіліктің артқаны деп түсінеді деген ойдамын. Өз басым көшеге Тұлға есімін беруді қолдаймын.{jcomments off}
Бағдан ҚАЙЫРЖАНОВ,
Семей қаласындағы физика-математика бағытындағы
Назарбаев Зияткерлік мектебінің директоры
