Қазақстан Республикасы Үкіметінің 2017 жылғы 31 қазандағы №689 қаулысына сәйкес елімізде наурыз айының екінші сенбісінде Жер қатынастары, геодезия және картография қызметкерлері күні аталып өтеді. Осы мереке қарсаңында «Азаматтарға арналған үкімет» мемлекеттік корпорациясы» КеАҚ Шығыс Қазақстан облысы бойынша филиалының Семей қалалық тіркеу және жер кадастры бөлімінің басшысы Ершат Абдурашидұлымен әңгімелескен едік.
— «Азаматтарға арналған үкімет» мемлекеттік корпорациясы» акционерлік қоғамының Шығыс Қазақстан облысы бойынша филиалының Семей қалалық тіркеу және жер кадастры бөлімі атынан барлық әріптестерімді кәсіби мерекелерімен құттықтағым келеді. Еңбектеріне сәттілік пен өркендеу тілеймін! — деп ізгі тілегін білдірді бөлім басшысы Ершат Назарбеков.
«Азаматтарға арналған үкімет» мемлекеттік корпорациясы» КеАҚ Шығыс Қазақстан облысы бойынша филиалының Семей қалалық тіркеу және жер кадастры бөлімі жылжымайтын мүлікке құқықтарды тіркеу, мемлекеттік емес заңды тұлғаларды тіркеу, жылжымайтын мүлік объектілерін техникалық тексеру, жерді тіркеу сынды қызметтерді атқарады. Бөлім ғимараты Семей қаласының сол жағалауында Байтұрсынов, 6 (Қазгипроземнің бұрынғы ғимараты) мекенжайында орналасқан. 130 адамнан құралған ұжымды бес жылдан астам уақыт бойы Ершат Абдурашидұлы басқарып келеді. Бөлімдер бойынша басшының орынбасарлары — Айжан Берікқызы, Мархабат, Сергей Александрович.
Басшылықтың шеберлігі мен қызметкерлердің адал еңбегінің арқасында бөлім өз саласында көшбасшы атанып отыр. Мекеме басшылығы әрдайым сала майталмандары қалдырып кеткен бай тарихын және қызметкерлерін мақтан тұтады. Олардың арасында қалалық, облыстық және республикалық жарыстардың жеңімпаздары атанған спортшылар мен суретшілер де бар.
— Жарты ғасырлық тарихы бар жер кадастры бөлімі уақыт сынына сай көптеген өзгерістерге ұшырады. Қазір жер қатынастары және кадастры заманауи және жоғары технологиялы салаға айналды. Өйткені, жұмыстың көп бөлігі цифрлық форматта жасалады. Цифрлық деректердің арқасында жер учаскелеріне мемлекеттік актілерді үйде отырып электронды үкімет порталы арқылы алуға болады. Яғни, жер учаскелеріне көк түсті мемлекеттік бланкілерді беру электронды форматқа ауыстырылды,- дейді бөлім басшысы Ершат Назарбеков.
Дәл сол сияқты электронды үкімет порталы жер учаскелеріне арналған жер қатынастары жобаларын жобалау кезінде жер учаскелерінің кадастрлық (бағалау) құнын анықтау, жердің сапасы туралы, МЖК ААЖ графикалық мәліметтері бойынша координаттарды мақұлдау қызметтерін енгізді. Осының арқасында қазір қызмет көрсету мерзімі қысқарып, мазмұны артты.
— Егер бұрын мемлекеттік меншіктен жер учаскесін атыңызға тіркеу үшін кеңселерді аралап, бірнеше ай уақыт өткізуге мәжбүр болсаңыз, енді бұл қызметті алу мерзімі бір айдан аспайды және «бір терезе» қағидаты бойынша жүзеге асады, — дейді бұл орайда басшының орынбасары Айжан Молдаханова.
Ғимараттың қабырғасында облыстың әр азаматы мамандардан кәсіби кеңес алып, әр түрлі меншік нысандары үшін шаруашылықаралық жерге орналастыру бойынша жерге орналастыру жобаларын жасау; ауылшаруашылық мақсатта шаруашылық ішіндегі жерге орналастыру бойынша жобалар әзірлеу; топографиялық-геодезиялық жұмыстар; жер учаскелерінің шекараларын белгілеу; жерді түгендеу; топырақтың қорытындысы; топырақты бағалау; жерді агрохимиялық зерттеу; мемлекеттік жер кадастры туралы ақпарат беру; ауылшаруашылық өнімі шығындарының құнын есептеу; кадастрлық нөмірлерді тағайындау; жылжымайтын мүлікті техникалық тексеру және басқа да құжаттарға тапсырыс бере алады.
Жоғарыда аталған барлық жұмыс түрлері жоғары дәлдіктегі AutoCad, ArGIS, CorelDraw, MapInfo геодезиялық құралдарымен және өзге де бағдарламалардың көмегімен орындалады.
— Біздің елді мекен шекарасында нысандар салу үшін жерге арналған мемлекеттік құжаттың жаңа түрі — жер-кадастрлық жоспарлар енгізілді. Биыл біздің қалада тұрғын үйлер салу үшін жер учаскелерінің үлкен аумағына жер-кадастрлық жоспарлар жасау және беру жоспарланып отыр. Бұл азаматтар үшін құжаттарды рәсімдеу қызметтерінің мерзімі мен құнын жеңілдетеді, — дейді Ершат Абдурашидұлы.
Семей қаласының бөлімі жыл сайын республикалық бюджеттен бөлінетін мемлекеттік тапсырмаларды орындайды. Мамандандырылған зертхананы иелену, топырақты зерттеу, жер мониторингі, топырақты тегістеу, топырақ карталарын құру, электронды жер кадастрлық карталарын құру жұмыстары жүздеген мың гектар жерде жүзеге асырылады. Бұл — мемлекет тарапынан көрсетілген үлкен сенім. Жерге орналастыру — мемлекеттің жер саясатын жүзеге асырудың маңызды құралы. Жер қатынастарын реттеуге, жерді ұтымды пайдалануды және қорғауды ұйымдастыруға бағытталған жер заңнамасының сақталуын қамтамасыз ететін шаралар жүйесі.
— Ел Тәуелсіздігінің 30 жылдығына орай, мен Қазақстанның тұрақты экономикаға, әлеуметтік салада, саясатта, мәдениетте және спортта жетістіктерге қол жеткізгендігін атап өткім келеді. Өз ісінің кәсіби мамандары – еліміздің болашағы!- деді сұхбат соңында Е.Абдурашидұлы.
Жер қатынастары, геодезия және картография қызметкерлерін кәсіби мерекелерімен құттықтай отырып, еңбектеріне табыс тілейміз!
Жадыра ТӨЛЕГЕНҚЫЗЫ, «Семей таңы»{jcomments off}
