25 мамыр күні қалалық әкімдікте Семей қалалық ардагерлер кеңесінің ХІІ конференциясы өтті. Жиынға қалалық ардагерлер кеңесінің төрағасы Амантай Доғалақов, шаһар басшысы Нұрымбет Сақтағанов және ардагерлер қатысты.
Семей қалалық ардагерлер кеңесі 60 мыңнан астам зейнеткердің басын қосып отырған облыстағы ірі ұйымның бірі. Ұйым құрамында Ұлы Отан соғысының он жеті ардагері бар. Олардың ең жасының өзі қазіргі күні 94-ке келсе, үш ардагер биыл ғасыр тойын тойлайды. Сондай-ақ 2600-ден астам тыл еңбеккері, Ленинград қоршауында болған төрт адам, алты концлагерь тұтқыны және 400-ден астам саяси қуғын-сүргін құрбаны – қалалық ардагерлер кеңесінің мүшесі.
Қалалық ардагерлер кеңесі кәсіпорындарда, ұйымдарда, мекемелерде, оқу орындарында, кенттік және ауылдық округтерде құрылған 160 бастауыш ардагерлер ұйымымен бірлесе жұмыс істейді.
ХІ және ХІІ есептік конференциялардың арасында бес жыл ішінде 85 Ұлы Отан соғысының ардагері өмірден өтіпті. Жиналғандар алдымен оларды бір минут үнсіздікпен еске алды.
— Құрметті, конференция делегаттары, ақ жаулықты аналар! Ең алдымен Сіздермен амандықта жүздескеніме қуанышты екенімді жеткізгім келеді. Ардагерлер кеңесі жастарды патриоттыққа, адамгершілікке тәрбиелеуде, өскелең ұрпақтың бойында отансүйгіштік қасиетті қалыптастыруда өзіндік орны бар үлкен ұйым. Сіздерді ХІІ есептік қалалық конференцияның ашылуымен және немере-шөберелеріңіздің мерекесі соңғы қоңырау салтанатымен құттықтаймын. Қалалық ардагерлер кеңесі тек қала көлемінде емес, облыстық, республикалық деңгейдегі шаралардың да белсенді қатысушысы, бастамашысы. Бүгінгі конференция жұмысына сәттілік тілей отырып, баршаңызға мықты денсаулық, қажымай қайрат, әр істеріңізге береке тілеймін,- деді қала әкімі Нұрымбет Сақтағанов.
Конференция барысында қалалық ардагерлер кеңесінің төрағасы Амантай Доғалақов кеңестің осы уақытқа дейін атқарған жұмысы туралы баяндады.
— Семей қалалық ардагерлер кеңесінің ХІІ конференциясы Ел Тәуелсіздігінің 30 жылдығымен тұспа-тұс келіп отыр. Бұл тарихи шаралар халқымыздың бірлігін, татулығы мен тыныштығын одан әрі нығайтады,- деді А. Доғалақов. – Соғыс және тыл ардагерлерінің барлығы да қамқорлыққа алынған және оларға әлеуметтік көмек көрсетіледі. Барлық зейнеткерлерді толық қамту үшін, сондай-ақ ардагерлер ұйымдарының бірлігі мен тұтастығын нығайту үшін салалық ардагерлер кеңесі құрылған. Атап айтсақ, педагогикалық және мектепке дейінгі мекемелерде, арнаулы орта және жоғары оқу орындары, медициналық, коммуналдық шаруашылық, сауда, ІІБ, темір жол, ауыл шаруалашылығы мекемелерінде ардагерлер ұйымдары бар. Барлық жұмыстар жоспарлы түрде жүргізілуде. Қалалық ардагерлер кеңесі және оның бастауыш ұйымдары – зейнеткерлердің азаматтық, әлеуметтік құқықтарының қорғалуын бақылауда ұстайды.
Қазақ КСР білім беру ісінің үздігі Рашида Хасанова жас ұрпақтың тәрбиесіндегі ардагерлердің рөлі туралы сөз қозғады.
— Зейнеткер мұғалім ретінде бүгін мен ардагерлердің шәкірт тәрбиесіне, ұрпақ тәрбиесіне қосқан үлесі жайлы айтқым келеді. Семейге қарасты Баженова ауылында дүниеге келген Айткеш Ибраев 19 жасында соғысқа аттанып, 20 жасында Кеңес Одағының батыры атанды. Ауылда Айткеш Ибраевқа ескерткіш қойылып, мектепке есімі берілді. Қазір бұл білім ошағында Айткеш Ибраев атындағы спорттық ойындар жылда ұйымдастырылады. Мектеп оқушылары батыр атындағы білім ордасында оқитындарын, ал ауыл тұрғандары жерлестерін мақтан тұтады. Роллан Мусин Сталинград шайқасына қатысып, соғыстан мүгедек болып оралды. Кейіннен Семейдегі қаржы-экономикалық колледждің директорлығына тағайындалды. Ол студенттерді колледжге таза аяқ киіммен, аппақ жейдемен келуді үйретті. Бұл дәстүр оқу ордасында әлі күнге сақталған. Бүгінгі күні колледж оқытушылары мен студенттері Роллан Мусин есімін ардақтап, қадір тұтады. Мұндай мысалдарды көптеп келтіруге болады. Халық өз батырларын ешқашан ұмытпайды. Олардың есімдері мен жасаған ерліктері жастарға рух береді, — деді Р.Хасанова.
Конференция барысында ауылдық окургтегі бастауыш ардагерлер ұйымының мүшелері де сөз сөйлеп, атқарған жұмыстары жайлы есеп берді.
Жадыра ТӨЛЕГЕНҚЫЗЫ
