Шығыс Қазақстан облысы әкімдігінде өткен жиында Семей қаласының әкімі Бақытжан Байахметов «Жұмыспен қамтудың 2020-2021 жылдарға арналған жол картасы» бағдарламасы аясында іске асып жатқан жобалар жөнінде есеп берді.
Жұмыспен қамту жол картасы –инфрақұрылымдық нысандарды салу, жөндеу және жаңғырту жөніндегі республиканың жобаларын іске асыру арқылы жаңа жұмыс орындарын ашып, азаматтарды жұмысқа орналастыруға бағытталған тиімді шара.
Осы бағдарлама аясында Шығыс Қазақстан облысында 9 инфрақұрылымдық жоба бойынша тұрақты жұмыс орындарын ашу көзделген. Оның төртеуі Семей қаласына тиесілі.
Бақытжан Баяхметов «Степной кентіне 300 орындық орта мектеп салу» жобасының жұмыстары биыл желтоқсан айына дейін жалғасатынын және «РК-3 «Теплокоммунэнерго» МКК қайта жаңартудың «3-кезегі» жобасы бойынша азаматтарды жұмыспен қамту 2022 жылы іске асырылатынын жеткізді. Сонымен қатар «Суықбастау кентінің су құбыры желісін қайта салу және кеңейту» жобасы аясында да жұмыссыздар жұмыспен қамтамасыз етілді.
Қала әкімінің айтуынша, бүгінгі таңда жұмыс көлемі 29%-ға орындалып, салынған 10 километрден астам су құбыры желісі 40 үйге жеткізілген.
-Суықбастау кентінде сондай-ақ 125 бақылау құдықтары орнатылды. Барлық жұмыс биыл 1 қазанға дейін аяқталуы тиіс. Ал «Ертіс өзенінің жағалауын нығайту (Бейбітшілік аралы, Мирный, Восточный кенттері және Пристань)» жобасының құрылысы биыл 12 шілдеде басталды. Бүгінгі таңда мердігер компания қажет материалдарға, соның ішінде көлемі 2х6 болатын жол плиталарына тапсырыс берді. Жұмыстар биыл желтоқсан айында аяқталады,- деді қала әкімі Б.Байахметов.
Маусым айында жұмыс орындарын құру жөнінде кеңес өткізіліп, барлық төрт жобаны іске асыру барысында 160 адам уақытша және 127 адам тұрақты жұмыспен қамтамасыз етілген.
– Жұмыс беруші мердігер компанияларға «электрондық еңбек шарттарын есепке алудың бірыңғай жүйесі» және «интеграцияланған карта: жұмыс орындарын құру мониторингі» ақпараттық жүйесі арқылы инфрақұрылымдық жобаларға жұмысқа орналасу қағидалары мен шарттары түсіндірілді. Мәселе менің тұрақты бақылауымда, – деді қала әкімі Б.Байахметов.
