Шығыс Қазақстан облысының бас мемлекеттік санитарлық дәрігері Қ.А.Тұрдиевтің жаңа қаулысы жарияланды.
Құжатқа сәйкес, карантин аймағымыз бойынша 30 қазанға дейін ұзартылды. Шектеу шараларының мерзімі облыс аумағында COVID-19 инфекциясының таралуы бойынша ахуалдың өзгеруіне сәйкес қайта қаралуы мүмкін.
Бүгінде CОVІD-19 жұқтырған науқастарды емдеуге арналған инфекциялық стационарлардағы төсек қорының толтырылу деңгейі – 19,5 пайыз. Облыс бойынша инфекцияның репродуктивтік R саны – 0,971.
Осы ретте ШҚО Санитарлық-эпидемиологиялық бақылау департаменті халықты карантин талаптары мен республикалық, облыстық бас мемлекеттік санитарлық дәрігерлердің қаулыларындағы барлық шектеулерді сақтауға шақырады.
Осы орайда айта кетсек, бүгінгі таңда Шығыс Қазақстан облысында коронавирусқа қарсы вакцина алғандар саны күн сайын артып келеді. ШҚО әкімдігінің мәліметіне сүйенсек, 18 қазандағы жағдай бойынша, облыс жұртшылығы арасында екпенің бірінші компонентін алғандар үлесі 81,2 пайызды құрап отыр. Ал жалпы халықтың 68,1 пайызы вакцинаның екі компонентін де салдырған. Вакцинаның екі компонентін салдыру көрсеткішінде Бесқарағай (тұрғындардың 91,3 пайызы), Үржар (90,5 пайыз) және Абай (87,2 пайыз) аудандары алдыңғы қатарда. Ал ең төменгі орында Шемонаиха ауданы тұр (53,7%).
Сондай-ақ Өскемен қаласында халықтың 58,4 пайызы ғана екпенің екі компонентін алған. Соңғы тәулікте Шығыс Қазақстанда 103 адам қауіпті дертке шалдыққан. Бүгінгі таңда облысымыз «сары» аймақта тұр.
«СТ» – ақпарат
