15 қараша күні РСУ кенті бағытындағы Туристическая көшесінің бойында өзін-өзі оқшаулайтын сымдарды тарту жұмыстары басталды. Бұл — қаланың орталығын шеткі ауданмен байланыстыратын ең ұзын көшелердің бірі. Бұған дейін бұл көшеге 73 металл бағана орнатылған болатын.
Бұл жұмыстардың барлығы Семей қаласының көшелерін жарықтандыруды жаңғырту бағдарламасы аясында жүзеге асырылуда. Бүгінгі таңда осындай жұмыстар 32 көшеде жүргізілуде, қолданыстағы тіреуіштерден басқа 201 қосымша тірек орнатылды.
— Тағы 18 көшеге жарықтандыру орнату жоспарланып отыр, оларға темірбетон тіректер орнатылады. Ал орнатылған тіректерге, қажет болған жағдайда, жетіспейтін кронштейндер бекітіледі. Барлық материалдарға тапсырыс берілді. Біріккен энергосервистік компания бұл жұмыстарды 31 желтоқсанға дейін жоспарланған желілік кестеге сәйкес жүргізеді.
Туристическая көшесіне келетін болсақ, мұнда 2-3 күн бойы ұзындығы 3 шақырымдай өздігінен оқшауланған сымдар тартылып, содан кейін шамдар мен басқару шкафтарын орнату жұмыстары басталады,- деді қала әкімі Б.Байахметов.
Сәтбаев және Титов көшелерінде де өздігінен оқшауланған сымдарды ауыстыру жүргізілуде.
Айтолқын САМАТОВА,
«Семей таңы»
