Семей қаласында терроризмге қарсы операция жалғасуда. Бүгінде барлық өмірлік маңызы бар әкімшілік және әлеуметтік объектілер құқық қорғау органдарының бақылауында.
Қалалық әкімдік ғимаратын заңсыз басып алу бойынша 5 қылмыстық іс қозғалды. 32 адам қылмыс жасады деген күдікке ілініп, оларға қатысты тергеу амалдары жүргізілуде. Тәртіпсіздікке қатысқан 109 адамға қатысты сот шешімдері шығарылды. Барлығы 146 адам қамауға алынды.
Медициналық көмекке қала ауруханаларына 78 адам жүгінді. 14 адам ауруханаға жатқызылды.
Семей әкімдігінде материалдық шығынды анықтау жұмыстары басталды. Ғимаратта жиһазға, әйнекке, компьютерлік жабдыққа айтарлықтай зақым келді. Асхана мен жеке қызметтік кабинеттер толығымен бұзылды. Экстремистер мен тонаушылар ноутбуктер, бейнекамералар және басқа да кеңсе техникаларын алып кеткен. Бүгінде әкімдік штаттық режимде жұмыс істеуде.
Семей қаласының әкімі Бақытжан Байахметов осы күндері бірнеше жедел кеңес өткізді.
Банк басшыларына үздіксіз жұмысты қамтамасыз ету тапсырылды. Бүгінгі таңда қалада бар 13 екінші деңгейлі банктің 39 филиалы тұрақты жұмыс істейді. Банкоматтардың басым көпшілігінде қажетті қолма-қол ақша бар, оның ішінде ұялы байланыс негізінде 29 банкомат бар.
Қала әкімі коммуналдық қызмет басшыларына күшейтілген режимде жұмыс істеуді тапсырды. Диспетчерлер тұрғындардың қоңырауларына дер кезінде жауап беріп, туындаған ақауларды дер кезінде жоюы тиіс.
Сондай-ақ, әкімдікте газбен қамтамасыз ету мәселелері бойынша кеңес өтті. Қалада газ толтыратын 11 ұйым жұмыс істейді. Автокөлік жүргізушілеріне арналған Газ 60 теңге бағамен сатылады. Ал баллондардағы тұрмыстық газ баллон үшін 2500 теңгеден сатылады. Қала бойынша барлығы 88 ГРУ (газ тарату қондырғылары) бар.
«Осы қиын-қыстау күндерде біздің құқық қорғау органдарына, әскери қызметшілерге жан-жақты қолдау көрсететін еріктілерге, қаламыздың патриоттарына алғыс айтқым келеді. Дәмханалардың, мейрамханалардың, асханалардың иелері тәртіп сақшыларын үздіксіз тамақпен қамтамасыз етуде үлкен көмек көрсетуде. Еріктілер жасақтары көшелерді патрульдеуге және қоғамдық тәртіпті сақтауға көмектесуде», – деді Бақытжан Байахметов.
Семейде бір жарым мыңға жуық дүкендер, супермаркеттер, дәмханалар, мейрамханалар, базарлар жұмыс істейді. Олардың барлығы штаттық режимде жұмыс істейді. Алкоголь өнімдерін сатуға ғана тыйым салынған.
Қала әкімі Бақытжан Байахметовтың тапсырмасы бойынша әлеуметтік дүкендердің жұмысы ерекше бақылауға алынды. 10 арнайы дүңгіршек пен 20 дүкен үздіксіз жұмыс істейді, тұрақтандыру қорынан азық-түлік уақтылы жеткізіледі. Мысалы, пияз, қырыққабат, сәбіз, картоп бір килограмы үшін 82 теңге бірыңғай бағамен сатылады. Жұмыртқа 33 теңгеден сатылады.
Семей қаласы әкімінің баспасөз қызметі
