Облыс әкімі Даниал Ахметов қала және аудан әкімдерімен жиын өткізіп, қазіргі жағдай туралы баяндады. Бүгінгі күні облыста жағдай тұрақталып, барлығы бақылауға алынған. Бұл туралы аймақ басшысы өзінің әлеуметтік желідегі жеке парақшаларында жазды.
Аймақ басшысы арандатушылыққа бой алдырмаған тұрғындарға алғысын білдіре отырып, бүгінгі таңда 1000-нан астам адам ұсталып, әрқайсысы бойынша тергеу жүргізіліп жатқанын, экстремистер Қазақстан Республикасы заңнамасына сәйкес жазаға тартылатынын айтты. Қоғамдық көлік, ауданаралық автобус қатынасы тұрақты және барлық банктер, банкоматтар, дүкендер, дәріханалар мен әлеуметтік объектілер штаттық режимде жұмыс істеп тұр.
Даниал Кенжетайұлы сонымен қатар Қазақстан Президенті Қасым-Жомарт Тоқаевтың тапсырмасы бойынша халықпен және мемлекеттік органдармен түсіндіру жұмыстары жүргізілетінін айтты. Сондай-ақ өңірдің Қарулы Күштерінің жарақтандырылуын жақсартуға байланысты техникалық ұсыныстар барын, баға белгілеу, әлеуметтік маңызы бар тауарлар құнын бақылау туралы айта келіп, азаматтардан келіп түсетін өтініштердің назардан тыс қалмайтынын атап өтті. Сонымен қатар вакцинация мен ревакцинация шараларын күшейту керектігін де еске салды.
— Экстремистік арандатушылыққа бой алдырмаған барлық шығысқазақстандықтарға алғыс айтқым келеді. Сіздердің парасаттылықтарыңыздың арқасында біз тонау оқиғаларынан аулақ болдық. Біз алғаш рет осындай ауқымдағы террористік қауіпке тап болдық. Қазір облыста жағдай тұрақты, барлығы бақылауға алынған.
Қазақстан Президенті Қасым-Жомарт Тоқаев халықпен және мемлекеттік органдармен түсіндіру жұмыстарын жүргізуді және қойылған міндеттерді орындау алгоритмдерін дайындауды тапсырды. Қауіпсіздік — қазір таңдағы басты фактор. Өңірдің Қарулы Күштерін жарақтандыруды жақсарту бойынша техникалық ұсыныстар бар. Оны іске асыруымыз керек, — деді облыс әкімі Даниал Ахметов.
Жиында бұдан басқа да — баға белгілеу, бейінді ведомстволардың әлеуметтік маңызы бар тауарлардың құнын бақылауды қамтамасыз етуі сынды маңызды мәселелер талқыланды.
Кеңес отырысында сондай-ақ облыс әкімі АӨК өкілдеріне осы секторды субсидиялау бойынша ұсыныстар әзірлеуді тапсырды.
«СТ» — ақпарат
