Есімі аймағымызға белгілі еңбек ардагері, мемлекет және қоғам қайраткері Хафиз Матаев тұрған үйге ескерткіш тақта орнатылды.
Семей облысының және Абай ауданының Құрметті азаматы болған, Қазақ КСР-нің халық ағарту ісінің үздігі, КСРО және Қазақстанның мемлекеттік марапаттарының иегері Хафиз Матайұлының еліне сіңірген еңбегі қалың елінің есінде.
Өткен жылы 90 жасқа аяқ басар шағында өмірден озған Хафиз Матаевтың еңбек жолы — келер ұрпаққа үлгі. Оған абыз ақсақалдың елі үшін атқарған ұшан-теңіз еңбегі, соңында қалдырған мол ғибраты ғана емес, өзі тұрған үйдің төріне орнатылған ескерткіш тақта да дәлел болса керек.
Салтанатты шараға Хафиз Матайұлының замандастары, тізе қоса еңбек еткен аға буын өкілдері — жақын досы болған Дүйсен Сұлтанов, танымал ғалым, профессор Арап Еспембетов, еңбек ардагері Амантай Мұқатаев, Абай ауданының Құрметті азаматы Жақсылық Екібаев сынды ел ағалары қатысып, өткен күндерден естелік айтты. Жиналған қауым Хафиз Матайұлының өнегелі өмір жолынан сыр шертіп, оның қайраткерлік болмысын тілге тиек етті.
Семей өңірінің зиялы қауымы қайраткер тұлғаға осылайша құрмет көрсетті.
«СТ» — ақпарат
