Семей қаласының әкімі Бақытжан Байахметов Семей қаласының қиын өмірлік жағдайға тап болған тұлғаларды қайта әлеуметтендіруге арналған орталығында болды.
2000 жылы құрылған бұл орталық 1970 жылы салынған 5 қабатты ғимаратта орналасқан. Мұнда 120 орындық уақытша бөлімше және 30 орындық түнде қонуға арналған бөлімше бар.
Орталықтың 50-ге жуық қызметкері осында түскен адамдарға әлеуметтік бейімделуі үшін қолайлы жағдай жасауға көмектеседі. Мұнда қызмет алушылар үшін арнайы әлеуметтік қызметтер және оңалту іс-шаралары кешені қарастырылған. Бүгінде орталықта 93 қөмекке мұқтаж адам бар. Негізінен, қамау орындарынан босатылған, отбасылары бас тартқан ер адамдар. Олар мұнда бейімделуден өтуде.
Тағдыры ауыр адамдардың бірі Анатолий Косинцев 11 рет сотталып, 36 жыл түрмеде отырған. Есениннің өлеңдерін жатқа біледі. Ешқашан жұмыс істемеген. Қайта әлеуметтендіру орталығында өмірінде алғаш рет еден сыпырып, жууды үйренген. Орталық мамандары оған зейнетақы құжаттарын рәсімдеуге және қарттар үйіне орналасуға көмектесуде.
Ал Галина Кочева күйеуі қайтыс болғаннан кейін маскүнемдікке салынып кеткен, нәтижесінде көп жыл бойы құлдықта болған. Мал жайып жүргенде аязды күні үсік шалған оны қалаға әкеліп, еш құжатсыз тастап кеткен. Дәрігерлер оның екі қолының саусақтарына ампутация жасаған.
Ресей азаматы Ольга Никитина саудагер болған. 90-шы жылдары Шығыс Қазақстанға тауар жеткізумен айналысқан. Сөмкесі мен барлық құжаттарын жоғалтқан. Екі қызы Барнаулда тұрады. Ресейде ол қайтыс болған адам ретінде тіркелген. Енді көші-қон қызметі арқылы оның құжаттарын қалпына келтіріп, тіркеуден шығару керек.
Орталықта тұрудың ең ұзақ мерзімі-1 жыл. Осы уақыт ішінде көмекке жүгінушілердің құжаттарын қалпына келтіруге немесе рәсімдеуге көмек көрсетіледі. Олар орталықтан шыққаннан кейін жұмысқа орналасуы үшін электрик, сантехник және басқа да жұмысшы кәсіптерінің тегін курстарына жіберіледі.
Қала әкімі орталықтың жұмысымен танысып, қызмет алушылармен әңгімелесті.
Екі жыл бұрын «Жұмыспен қамту жол картасы» аясында орталық ғимаратында және оған іргелес аумақта жөндеу жұмыстары жүргізілген. Материалдық-техникалық базаны нығайтуға қаржы бөлінген. Бірақ, жиһаз бен медициналық жабдықтардың жетіспеушілігі, қызмет алушыларды тасымалдауға арналған арнайы санитарлық автомобильдің болмауы сынды әлі де шешімін күткен мәселелер бар.
«Мен барлық кабинеттерді мұқият қарап шықтым. Бос ғимарат бар екенін байқадым. Мұнда тұрмыстық зорлық-зомбылыққа тап болған адамдарға көмек көрсету үшін қосымша бөлім ашуға мүмкіндік бар. Семейде мұндай арнайы орталық жоқ. Барлықтарыңызға белгілі, біздің қаламызда тұрмысы нашар отбасылар бар. Әйелдерге зорлық-зомбылық көрсетілген жағдайлар да бар. Мұндай жағдайларда олардың баратын жерлері жоқ. Осындай дағдарыс орталығының ашылуы отбасылардағы әлеуметтік шиеленісті жеңілдетуге септігін тигізер еді», — деді Семей қаласының әкімі Бақытжан Байахметов.
25 орынға арналған дағдарысқа қарсы орталықты ашу үшін арнайы қаржыландыру қажет. Бастапқы кезеңде бұл шамамен 57 миллион теңгені құрайды. Психолог, заңгер, медицина қызметкерлері сияқты 8 қосымша штат ашу қажет болады.
Бақытжан Байахметов жақын арада тұрмыстық зорлық-зомбылық құрбандарына көмек көрсету бөлімшесін ашу мәселесін қарастыратындығын жеткізді.
Семей қалалық ішкі саясат бөлімі
