Семей қаласының әкімдігінде су тасқынына қарсы іс-шараларды дайындау және өткізу жөнінде жедел штаб отырысы өтті.
Жиында айтылғандай, 9 ақпандағы жағдай бойынша өңірде су тасқынына қарсы жағдай тұрақты. Ертіс өзенінің деңгейі шекті белгіден асқан жоқ. Шығыс кентінде және Бейбітшілік аралында су деңгейіне тәулік бойы бақылау жүргізілуде. Дальний ауданындағы 950 метр арық жүйесі, 1-3 Омская көшелері мұздан тазартылды. Қар арналарын қазу және тазарту жұмыстары жүргізіліп жатыр. 1 тоннадан астам инертті материал дайын тұр.
Комиссия мүшелері Шығыс кентіндегі Луговая көшесінде орналасқан арық жүйесіне ерекше назар аударды. Жақында Семей қаласының әкімі Бақытжан Байахметов аталмыш аумаққа барып, сол жерде кеңес өткізген болатын. Мұндағы жерлер негізінен батпақты және жазық болып келеді. Қаулап өскен шөп, қамыс пен ағаш бұтақтары судың арналарын жауып тастайды да, күн жылынған кезде жағадан шығып, үйлерді басады. Жергілікті тұрғындардың су арналарына қоқыстарын төгуі де жағдайдың күрделенуіне себеп болып жатады. Су тасқынына қарсы жұмыстардың қарқыны мен жүргізілу барысына көңілі толмаған қала әкімі Бақытжан Байахметов көктемде ағын судың кептеліп, айналасына жайылмауы үшін тез арада бұл аумақты шөптер мен қамыстардан тазартуды тапсырды. Мұнда ауыр техниканы қолдану мүмкін емес. Сондықтан, түрлі құралдарды пайдалана отырып қолдың күшімен тазартып, суағардағы мұз бен қамысты кесіп тастау қажет.
Қала басшысы еңбек өнімділігін арттыру үшін ТЖМ әскерлері мен коммуналдық қызметтердің күштері мен техникасының үйлесімді жұмыс істеуін талап етті.
— Күннің жылынуын күтудің қажеті жоқ. Жоғарыда аталған жұмыстарға ертеңнен бастап кірісу керек. Күрек пен лом ұстаған біраз адам көп жұмыс тындыра алмайды. Техника санын көбейтіп, қолда бар барлық ресурстарды пайдалану керек, — деді Бақытжан Байахметов.
Су тасқынына қарсы жұмыстарды жүргізу үшін күн сайын 18 текше метр ыстық су қажет. Қала қазандықтарында бұған қажетті су қоры жоқ. Қала әкімі уақытша шара ретінде қажетті ыстық суды МЭН және РК-3 қазандықтарынан алуды тапсырды. Бірақ болашақта бұл мәселе жүйелі түрде шешілуі тиіс.
Жиында сондай-ақ, Шығыс және Водный кенттерінде су бұру каналын салу бойынша жобалық-сметалық құжаттама әзірлеу мәселесі қаралды. Су тасқыны кезеңінде Красный кордон ауданындағы жер асты сулары жоғарыда аталған кенттерге қарай жылжиды да жүздеген үйлерге су басу қаупін төндіреді.
ЖСҚ әзірлеушілер екі нұсқа дайындаған. Екеуінің де артықшылықтары мен кемшіліктері бар. Біріншісінің бағыты қысқа, үш шақырымнан асады. Бірақ жеке сектордың аумақтары арқылы өтеді. Бұл болашақта арнаны тазарту мен күтіп ұстау жұмыстарын қиындатуы мүмкін.
Екінші нұсқа бойынша, жобаланған канал ұзындығы жағынан артық және оны теміржол желісі бойымен жүргізу жоспарланған. Бұл нұсқаны әртүрлі теміржол қызметтерімен үйлестіру жұмыстары ұзаққа созылуы мүмкін.
Нәтижесінде таңдау бірінші нұсқаға түсті. Бірақ оған қатысты да сұрақтар бар. Атап айтқанда, жоба бойынша 2 метр болатын арнаның жоспарланған тереңдігі көңілге қонымсыз. Бұл су ағысының баяулауына және қатып қалуына әкелуі мүмкін. Үш шақырым арнаның бойымен ағын су кедергісіз, іркіліссіз өтуі тиіс. Арнаның еңісіне қойылған белгілер оның қалыпты жұмыс істеуіне сәйкес келмейді.
Қала әкімі Бақытжан Байахметов аталған жобаға қатысты ескертулерді мұқият талдап, кемшіліктерді жоюды тапсырды.
Семей қаласы ішкі саясат бөлімі
