Семей қаласының әкімі Бақытжан Байахметов Шығыс кентінің саяжай кооперативі тұрғындарының бастамашыл тобының өтінішіне орай кездесу өткізді. Бұл — бір кездері ауылшаруашылық жерлерінің саяжай кооперативі болып құрылып, уақыт өте келе аумағы ұлғайған ерекше жағдайы бар Шығыс кентінің бір бөлігі.
Биыл сәуір айында шығыс оң жақ және шығыс сол жақ кентінің егжей-тегжейлі жоспарын әзірлеуге конкурс жоспарланған.
Биыл сәуір айында шығыс оң жақ және шығыс сол жақ кентінің егжей-тегжейлі жоспарын әзірлеуге конкурс жоспарланған.
Қала әкімімен кездесуде тұрғындар бірқатар мәселелерді көтерді. Алғашқы сауалдарының бірі жаңа мектептің ашылуына қатысты болды. Мұнда 1200 орындық жалпы орта білім беретін мектеп салу туралы шешім 2019 жылы облыс әкімі Даниал Ахметовтің қолдауымен қабылданған болатын. Мектептің ашылу мерзімі дәлелді себептермен бірнеше рет ауыстырылды. Шаһар басшысы биыл 1 қыркүйекте жаңа мектепте алғашқы қоңырау соғылады деп уәде берді.
Бүгінгі күні қала әкімдігі тарапынан кент тұрғындарының тұрмысын жақсартуға бағытталған бірқатар жұмыстар жүзеге асырылуда. Айталық 1 миллиард 647 миллион теңге қаржы бөлініп, «Шығыс кентінің су құбыры желілерін қайта құру және кеңейту» жобасы қолға алынды. Желілердің ұзындығы 34 шақырымды құрайды. Жоба аясында жаңа мектепті, балабақшаны және 20-дан астам көшені орталықтандырылған су жүйесіне қосу көзделіп отыр.
Мұнда сондай-ақ көше жарығын жаңғырту жұмыстары жүргізілуде. Биыл 13, 17-линия, Ақжол көшесі, Ақжол тұйық көшесі 1, 2, Елтай, Жібек Жолы және Абдуали көшелерінде жарық орнатылады. Келер жылы тағы 8 көше жарықтандырылмақ. Тұрғындар қала әкіміне электр энергиясының қымбаттығын айтып шағымданды.
— Жергілікті иесіз желілер сот шешімімен ТҮКШ бөлімінің теңгеріміне берілді. Қазіргі таңда кейбір желілер осындағы трансформаторлық қосалқы станцияларына қосылған. Тұрғындар дербес шоттарын ашу үшін «Шығысэнерготрейд» абоненттік бөліміне жүгінулері қажет. Қазіргі таңда ТҮКШ бөлімі қосымша ТҚС — 584 және ТҚС — 285 рәсімдеу жұмыстарын жүргізуде. Оларды тіркегеннен кейін тұрғындар абоненттік бөлім арқылы жеке шоттарын аша алады, — деді Бақытжан Байахметов.
Бастамашыл топ мүшелері қоқыс шығару мәселесін де көтерді. Шығыс кентінде қатты тұрмыстық қалдықтарды шығарумен «Сегізбаев» ЖК компаниясы айналысады. 1190 жеке меншік үйге қызмет көрсетіледі. Бұған қоса жыл сайын бюджет қаражаты есебінен кенттен рұқсат етілмеген орындарда жиналған қоқыс үйінділері шығарылады.
Қала әкімі тұрғындарға бірге тұратын барлық отбасы мүшелерін көрсете отырып, Семейдегі қоқыс шығаратын компаниялармен келісімшартқа отыруды ұсынды. Сонымен қатар жергілікті учаскелік инспекторға рұқсат етілмеген қоқыс орындарын жою үшін, жұмысты күшейту тапсырылды. Әкімшілік құқық бұзушылық туралы кодекстің 505 — бабына сәйкес, инфрақұрылым объектілерін бүлдіргендерге, жасыл желекті жойып немесе нұқсан келтіргендерге ескерту жасалатыны немесе жеке тұлғаларға — жиырма АЕК мөлшерінде, шағын кәсіпкерлік субъектілеріне және коммерциялық емес ұйымдарға — отыз, орта кәсіпкерлік субъектілеріне — қырық, ірі кәсіпкерлік субъектілеріне — жүз АЕК мөлшерінде айыппұл салынатыны айтылды.
Кент тұрғындарын жиі мазалайтын мәселелердің бірі — қаңғыбас иттердің көп болуы. «Семей ветеринария» КМК мәліметтері бойынша, өткен жылы мұнда бір жарым мыңға жуық, осы жылы бір жарым айдың ішінде жүзден астам ит ауланған. Кәсіпорын басшылығына қаңғыбас иттер жайлы шағымданған тұрғындардың өтініштеріне уақтылы жауап беру тапсырылды.
Қала басшысы кентте жүзеге асырылатын басқа да жобалар туралы айтып өтті. Мысалы, биыл спорт және балалар алаңдары салынады.
Анар АХМЕТҚАЛИЕВА,
«Семей таңы»
