Жазылған жайдың жаңғырығы
Үстіміздегі жылдың 15 ақпанында «Семей таңы» газетінде жарық көрген қоғам қайраткері, белгілі ғалым Болатбек Нәсеновтың «Қара қылды қақ жарған Қазыбек би» атты мақаласында және бір топ азаматтардың Семей қаласының әкімі Б.К.Байахметовке жазған хаттарында көтерілген, биыл туғанына 355 жыл толатын, қазақ мемлекеттілігі – Қазақстан хандығы тұсындағы ел іргесін нығайтуға өлшеусіз үлес қосқан ірі мемлекет қайраткері, әділдікті ту етіп, «Тура биде туыс жоқ…» ұстанымымен өмір сүрген, тірісінде халқы «Қаз дауысты Қазыбек» атандырған ұлы би Қазыбек Келдібекұлына Семей қаласында ескерткіш орнату және көше атын беру туралы ұсынысты толық қолдаймын.
Мұхтарбек КАРИМОВ,
тарих ғылымдарының кандидаты, Шәкәрім университетінің профессоры
ҰСЫНЫС ҚОЛДАУ ТАБАДЫ ДЕГЕН СЕНІМДЕМІН
Құрметті оқырман қауым! Адал еңбек етіп, өнегелі өмірімен ұрпаққа үлгі болып жүрген «елім» деген азаматтар!
«Semei tany» газетінің №17 (15 ақпан) санында тарих ғылымдарының докторы, профессор, республикаға ерекше еңбек сіңірген зейнеткер Болатбек Нәсеновтің «Қара қылды қақ жарған Қазыбек би» атты мақаласымен бірге зиялы қауым өкілдерінің ұлы даланың ұлы тұлғаларының бірі Қазыбек бидің есімін шаһар орталығындағы көшенің біріне беру туралы Семей қаласының әкімі Б.К.Байахметовтің атына жазған өтініші жарияланыпты.
Мен Қаз дауысты Қазыбек бидің тікелей алтыншы ұрпағымын, үлкен ұлы Қазымбеттен тараймын. Бұл ұсынысты ұлы бидің ұрпағы болғандықтан ғана емес, еліміздің отаншыл азаматы ретінде де қолдаймын.
Қаз дауысты Қазыбек би – қазақ мемлекетінің негізін қалаушылардың бірі. Көрнекті қоғам және мемлекет қайраткері. Ұлт тұтастығын ойлаған Қазыбек би бүкіл ғұмырын Қазақ хандығын нығайту, іргелі ел ету, көршілес мемлекеттермен достық, көршілік қарым-қатынас орнатуға арнады. XVII ғасырда өмірге келген Әз Тәукенің «Жеті жарғы» заңдар жинағын жасауға да белсене атсалысты.
Қаламызда Қаз дауысты Қазыбек бидің даңқын асқақтатып, көшеге атын берсек, ескерткіш тұрғызсақ, бұл Семей елінің даналарымызға көрсеткен құрметі болар еді. Әкімдік тарапынан бұл ұсыныс қолдау табады деген сенімдемін.
ЗЕЙНОЛЛА ТОҚАЕВ,
ветеринария ғылымдарының докторы, Семей қаласы Шәкәрім атындағы мемлекеттік университетінің профессоры, «Құрмет» орденінің иегері,
Семей қаласы аумақтық сайлау комиссиясының төрағасы
