Қаперде жүрер қатер
Облыс көлемінде су тасқыны кезеңіне дайындық шаралары қарқынды жүргізілуде. Арнайы құрылған топтар тасқынның алдын алуға кіріскен.
ШҚО Төтенше жағдайлар департаменті баспасөз қызметінің мәліметіне сүйенсек, облыс әкімінің өкімімен су тасқыны кезеңіне дайындық аясында арнайы жұмыс топтары құрылған. Олардың құрамына жергілікті атқарушы билік органдары өкілдері, құтқарушылар, Ертіс бассейндік инспекциясы және басқа да органдардың мамандары кірген.
Жалпы өткен қаңтар айында-ақ өңірлердегі қар қалыңдығын, Ертістегі мұздың қалыңдығын анықтау үшін өзен бойын аралау жұмыстары басталған болатын. Су басу қаупі бар аймақтарындағы барлық гидроқұрылыстар мен елді мекендер, іргелес аймақтар ерекше бақылауға алынған. Жағдай жіті қадағаланып отыр. Күннің күрт жылынуына байланысты өзен суының артуы байқалған жағдайда жүргізілетін жұмыстың жоспары да нақтыланған болатын.
«Бүгінде олар Бородулиха, Абай, Катонқарағай аудандарына барып, қар шығару және су өткізу құбырлары мен каналдарды тазалау жұмыстарын тексерді. Сондай-ақ қажетті материалдық-техникалық құралдардың дайындығы, халық арасында түсіндіру жұмыстарының жүргізілуі, өзендерде жоспарланған жарылыс жұмыстарының орындарын бақылады», — делінген облыстық Төтенше жағдайлар департаменті баспасөз қызметі ақпаратында.
Жұмыс тобының мүшелері кәсіпкерлермен азық-түлік өнімдерін және дәрі-дәрмектерді жеткізуге, эвакуацияланған тұрғындарды орналастыруға байланысты келіссөз жүргізді. Әкімдікте және ауылдық округтерде жауапты лауазымды тұлғалардың тәулік бойы кезекшілік жасау кестесі бекітіліп, су тасқыны болған жағдайда халықты хабардар ету схемасы анықталды.
Жалпы, облыс бойынша каналдар мен арықтарды, су өткізу нысандары мен көпірлерді тазарту жұмыстары жүріп жатыр. 222 мың текше метр қар шығарылып, 85 мың қап, 6 мың тонна инертті материалдар дайындалды.
«Құтқарушылар жақын арада қаладағы тұрғын үйлерді аралауды бастайды. Жұртшылыққа көктемгі су тасқыны кезеңіне қатысты нақты нұсқаулықтар өткізіп, ақпараттық жаднамалар таратылады. Сонымен қатар, мердігер ұйымдардың да су тасқынына дайындығы тексеріледі», — делінген аталған ақпаратта.
Айта кетейік, су тасқынының алдын алу шаралары облыс әкімі Даниал Ахметов пен қалалар және аудандар әкімдерінің қатаң назарында тұр.
Азамат ЕРСАЙЫН,
«Семей таңы»
