Облыс әкімі Даниал Ахметов аймағымыздың білім беру саласындағы мәселелерге қатысты келелі кеңес өткізді. Жиын барысында облысымызда соңғы жылдары жүзеге асырылып жатқан «Білікті маман» жобасы талқыланды.
Аймақ басшысы айтып өткендей, қосымша факультеттердің ашылуы, ЖОО мен колледждердің техникалық жабдықталуы, құзырет орталықтарының ашылуы мектеп түлектерінің көрші мемлекеттерге кетуін бес есе азайтуға мүмкіндік берген.
— Өткен жылы 2017 жылы оқуға түскен студенттер білімдерін тамамдап, барлығы таңдаған мамандықтары бойынша жұмысқа орналасқанын атап өткім келеді. Басым бөлігі «ЖОО-студент-жұмыс беруші» үш жақты келісім жасасып, өңірдің ірі компанияларында жұмыс істеуде және ауылдарға еңбек етуге кеткендері де аз емес. Бұл біз үшін қуантарлық жағдай.
Қазіргі таңда облыста зоотехниктердің, ветеринарлардың, дәрігерлердің жетіспеушілігі бар. Осы мәселені ескере отырып, аталмыш мамандықтар бойынша гранттар санын көбейту туралы шешім қабылдадық. Нәтижесінде мамандардың тапшылығы азайып, түлектерді жұмысқа орналастыруға да барынша мүмкіндік болады. Өз кезегінде, әлеуметтік жеңілдіктер де қарастырылатын болады, — деп атап өтті аймақ басшысы Даниал Кенжетайұлы.
Айта кетсек бүгінгі таңда Риддер қаласында және Қасым Қайсенов кентінде 600 орындық білім беру мекемесінің құрылысы аяқталуға жақын. Семейде екі мектептің құрылысы да жақын уақытта аяқталады, тек аумақты абаттандыру ғана қалған. Ал Шемонаиха ауданындағы мектеп жеке инвестициялар есебінен салынып жатыр.
Сондай-ақ жақсы нәтиже көрсеткен үлгілік жобаларды пайдалана отырып, алдағы уақыттарда Ұрынхайка, Жолмұқау, Шеңгелді, Малақ, Жыланды, Қапай батыр және Кеңтарлау ауылдарында бірнеше шағын жинақты мектептер салынатын болады.
Үлгілік жобалар бюджетті жаңа құжаттамаға жұмсамауға мүмкіндік береді, ал осы жобалармен жұмыс істеген мердігер компаниялар өздерін жақсы жағынан көрсете білді. Қазіргі таңда Аягөз, Семей қалалары мен Өскемендегі Нұрлы Жол ауданында мектептер салу бойынша конкурстық рәсімдер аяқталуда. Бұл орайда аймақ басшысы білім беру басқармасына оқу орындарын қайда және қанша орынға салу керектігі туралы деректерді өзектендіруді тапсырды. Сонымен қатар мектеп-интернаттар салу мәселесін де қарастыру қажет. Балаларға білім беру — басым бағыттардың бірі, сондықтан жаңа мектептер заманауи білім беру жүйесінің барлық талаптарына сай салынуы тиіс.
Тоқтала кетсек, бүгінгі таңда аймақта 644 білім беру мекемесі жұмыс істейді, дегенмен де олардың кейбіреулері жөндеуді қажет етеді екен. Алайда қалалар мен аудандардың әкімдері нақты не істеу керектігін түсіну үшін әр мектепке комиссиялық тексеру жүргізуі қажет. Барлық құрылыс және жөндеу жұмыстары нақтылануы керек. Бұл бюджетті үнемді жұмсау және қажетті жөндеудің сметалық құнынан асып кетуіне жол бермеу үшін қажет. Бірінші кезекте орта білім беру объектілерінің барлық ресми құжат түрінде расталған қажеттіліктеріне қаражат бөлу керек.
Әлібек КЕМЕЛХАН,
«Семей таңы»
