Ұлттық құндылықтар
Шығыс Қазақстан облысы Өскемен аймағы ақсақалдарының VI форумы өтті. Бұл форум ҚМДБ Төрағасы Бас мүфти Наурызбай қажы Тағанұлы хазіреттің бастамасымен жарияланған «Ислам — ынтымақ және бірлік діні» жылының аясында ұйымдастырылып отыр.
Ақсақалдар форумы Өскеменде жыл сайын дәстүрлі түрде өткізіліп келеді. Алқалы жиынға өңір ақсақалдары, имамдар, зиялы қауым өкілдері қатысты. Форумның басты мақсаты — дін мен дәстүр сабақтастығын нығайту, жерлеу, салттық рәсімдерді бір арнаға түсіруді насихаттау.
Іс — шарада ұлттық құндылықтар мен бірлік — ынтымақ мәселесі жан-жақты сараланды.
«Қазақ қоғамында және дәстүрлі тәрбиеде ақсақалдардың ролі аса зор. Қазіргі уақытта елдің бірлігі аса маңызды. Бұл жолғы форумның басты мақсаты елді ынтымаққа үндеу және жерлеу рәсімдерін бірізділікке түсіру, осы бағыттағы IV Республикалық имамдар форумының құжаттарын насихаттау болып отыр. Ақсақалдардың пікірлерін тыңдап, осы құжатты насихаттау мақсатында жерлеу әдебін бірізділікке түсірудің маңыздылығын да ортаға салып отырмыз», — деп атап өтті шараға қатысқан Өскемен аймағының өкіл имамы Ермек Қасболатұлы.
Бас имам ҚМДБ жанынан «Қамқор-Шарапат» салттық қызмет көрсету орталығы құрылып, жерлеу рәсімдерін ел көлемінде бір жүйеге түсіріп, құлпытастың, зиратты қоршаудың бірыңғай үлгілері бекітіліп, қолданысқа ене бастағанын және Өскемен аймағында бұл орталықтың жұмысы қолға алынғандығын атап өтті.
Жиында бірқатар қариялар көтеріліп отырған мәселеге байланысты өз ойларын ортаға салып, ұсыныстар білдірді.
Ақсақалдар кеңесінің төрағасы М.Мұхамеджанов өз сөзінде: «ҚМДБ тарапынан ақсақалдар институтын қолданысқа енгізіп, ұлттық құндылықтарға басымдық беруге талпынып отырғандығы құптарлық бастама», — деп атап өтіп, қариялардың ел бірлігін сақтаудағы рөліне тоқталды.
«Жерлеу рәсімдерін бірізділікке түсіріп, ысырапқа жол бермеу, бұрынғы салт-дәстүрді жаңғырту — бүгінгі күннің басты талабы. Қазірден бастап осы мәселені реттесек, келешек ұрпақ үшін де бұл үлкен маңызды тәрбие болар еді. Ас — науқандар байлық жарыстыратын форматта емес, өткен адамға құрмет көрсетудің өнегесін көрсету бағытында болғаны дұрыс», — дейді ҚР Мәдениет қайраткері, ШҚМУ-дың доценті, ҚАЕУ-дың «Құрметті профессоры» Нәбиолда Кемешев.
ШҚО ақпарат орталығы
