Қаперде жүрер қатер
ҚР Төтенше жағдайлар министрі Юрий Ильин облысымызға жұмыс сапарымен келіп, су тасқынының алдын алу шараларымен танысты.
ШҚО Төтенше жағдайлар департаменті баспасөз қызметінің мәліметіне сүйенсек, министр Юрий Ильин жедел-құтқару жасағына барып, су тасқыны кезеңіне дайындық барысымен танысып, арнайы техниканы көрді. Жасақ қарамағында 7 мотопомпа, 9 арнайы техника және 9 жүзу құралы бар.
«Сондай-ақ министр «Қазселденқорғау» ШҚ филиалына барды. Ондағы мамандар қыс басталғалы бері 46 рет жасанды жолмен қар көшкінін түсірген. Су тасқынына қарсы іс-шаралар аясында облыста каналдар мен арықтарды, су өткізу құрылыстары мен көпірлерді тазарту жұмыстары жүргізілуде. Өңір бойынша 222 мың текше метр қар шығарылды. 85 мың дана ыдыс — қап, 6 мың тонна инертті материал дайындалған», — делінген ақпаратта.
ШҚО төтенше жағдайлар департаменті баспасөз қызметінің мәліметіне сүйенсек, өңірде су тасқыны кезеңіне дайындық жүргізу бойынша құрылған комиссия жұмыс істеуде. Оның құрамына құтқарушылар, жергілікті атқарушы және мүдделі органдардың өкілдері кіріп отыр. Бүгінде облыстағы барлық су тасқыны қаупі бар аумақтар тексерілуде.
Су тасқынының алдын алу үшін өзен жағалауларын бекіту және түбін тереңдету, бөгеттерді жөндеу, арнаны реттеу және басқа да алдын алу шаралары жүргізіліп жатыр. Комиссия мүшелері азаматтарды уақытша орналастыру пункттерін, техниканың жай-күйі мен инертті материалдар қорын мұқият тексеруде.
Облыстық бюджетте төтенше жағдайларды жоюға 2,6 млрд теңге қарастырылған.
«Шығыс Қазақстанда су басуы мүмкін 108 елді мекен бар. Бүгінде оның 20-ында су басу қаупі сейілді, ал 69-ында барынша азайтылды. Жыл сайын су айдындарының жанында заңсыз салынған нысандарға қауіп төнеді. Су көтерілгеннен кейін ол ғимараттар су астында қалады», — деді Юрий Ильин.
Айта кетейік, бүгінгі таңда Өскемен қаласында, Алтай, Катонқарағай, Тарбағатай, Глубокое, Шемонаиха, Көкпекті және Бородулиха аудандарында су тасқыны қаупі сақталып отыр.
Өз тілшіміз
