Облыс әкімі Даниал Ахметов өткен аптаның соңында арнайы жұмыс сапарымен Риддер қаласында болып, жергілікті жұртшылықпен кездесті. Бірқатар өзекті мәселелерді тұрғындармен бірлесіп талқылады.
Кездесу барысында қала тұрғындары көкейдегі сауалдарын қойды. Олар әсіресе өз қалаларында жүзеге асырылатын жаңа жобалар туралы сұрады.
Бұл ретте, аймақ басшысы айтып өткендей, биылғы жылы бірнеше маңызды жобалар жүзеге асырылмақ. Мәдениет үйі мен орталық алаңды қайта жаңарту жұмыстары қолға алынады. Сонымен қатар көп бейінді аурухана кешенінің құрылысы мен арнаулы әлеуметтік қызмет көрсету орталығында да жөндеу жұмыстары жүргізілетін болады.
— Бұдан басқа, «Ботаника» жаңа шағын ауданында көп балалы отбасылар үшін 20 үй салуды бастаймыз. Риддерде көпбалалы 45 отбасы бар екен. Және де 600 орындық мектептің құрылысы аяқталуда. Бюджеттен жолдарды жөндеуге 560 миллион теңге бөлінгенін атап өткен жөн. Зейнеткерлердің өтініштерін ескере отырып, біз тек орталық көшелерді ғана емес, қаланың шет аймақтарын да асфальттауға тырысамыз, — деп жауап берді облыс әкімі Даниал Кенжетайұлы.
Сондай-ақ, аймақ басшысы жолаушылар көлігі және автомобиль жолдары басқармасына Тарханка ауылы арқылы өтетін Өскемен — Риддер қысқа жолын салу туралы ұсынысты қарастырып, есебін дайындауды тапсырды. Оның ұзындығы 60 шақырым ғана болады. Кездесуде сонымен қатар «Қазмырыш» компаниясы өз қазандығының құрылысын аяқтайтынын ескере отырып, келесі жылыту маусымына ерекше назар аудару қажеттігі де айтылды.
Алдағы уақыттарда Риддер қаласын көркейту және абаттандыру бағытында да бірқатар шаралар кезек күтіп тұр.
Қалалықтар бұл жұмыстарға қатысты өз пікірлерін ортаға салып, аймақ басшысына ұсыныстарын жеткізді.
Өз тілшіміз
