Семей қаласының әкімдігінде өткен кеңейтілген аппараттық кеңесте жеке және заңды тұлғаларға жер телімдеріне құқық беру бойынша жер комиссиясының жұмысы қаралды.
Айта кетейік, Семей қаласы мәслихатының шешімімен 11 адамнан тұратын жер комиссиясының құрамы бекітілген болатын. Оған қала әкімдігінің қызметкерлері, депутаттар мен Қоғамдық кеңес мүшелері кірген. Жер комиссиясының отырысы шешімдер қабылдау үдерісінің ашықтығын және айқындығын қамтамасыз ету мақсатында әрдайым аудиовизуалды түрде жазылып отырады.
Өткен жылы комиссия 44 рет отырыс өткізіп, 6600 мәселе қараған. Олардың көпшілігі жер телімін пайдалану, сондай-ақ жер телімінің нысаналы мақсатын өзгертуге қатысты болды.
Өткен жылы сонымен қатар ауыл шаруашылығына арналған жерлерге 8 байкау өткізілді. Нәтижесінде 81,6 мың гектар жерді пайдалану жөнінде құқық берілді.
Жиын барысында Семей қаласының әкімі Бақытжан Байахметов жерді рұқсатсыз иемденіп алу жағдайларының жолын кесу керектігін атап өтті. Шаһар басшысының айтуынша, әкімдікке келіп түсетін шағымдардың басым көпшілігі жерді пайдалану мәселелеріне қатысты.
Қала әкімі биыл жеке тұрғын үй құрылысы үшін кем дегенде 500 жер телімін бөлуді тапсырды.
– Жер телімдері мұқтаж жандарға бөлінуі керек. Оларды сатып алушыларға емес, тікелей баспана салатын адамдарға беру керек. Жер телімін сатып алған, бірақ заңнамада белгіленген мерзімде құрылысты бастамаған адамдармен жұмысты күшейту қажет. Егер 3 жыл ішінде бұл учаскелер бос болып және ешқандай жұмыс жүргізілмесе, оларды алып, үй салуға шынымен мұқтаж және дайын адамдарға беру керек», – деді Бақытжан Байахметов.
Бүгінгі күні Семей қаласы бойынша жер телімдерін алу кезегінде 23 мыңнан астам адам тұр.
Өз тілшіміз
