Облыс жаңалығы
Өткен апта соңында аймақ басшысы Даниал Ахметовтың қатысуымен өткен кеңесте «Білікті маман» жобасы аясында білім гранттарын бөлу мәселесі талқыланды.
Даниал Кенжетайұлы атап өткендей, ел Президенті Қасым-Жомарт Кемелұлы Тоқаевтың тапсырмасына сәйкес облысымызда мемлекеттік білім беру тапсырысының көлемі ұлғайтылды. Бұл орайда биылғы жылы жергілікті бюджет есебінен 450 грант бөлінді. Оның 222-сі техникалық мамандықтарға арналып отыр.
Сонымен қатар, облыстық білім басқармасы Кәсіпкерлер палатасымен және өңірдегі кәсіпорындармен бірлесіп, өткен жылдың көлемінде үлкен жұмыстар жүргізді. Атап айтқанда, 2026 жылға дейін 7 мыңға жуық маман дайындау керектігі анықталды. Бұл ретте олардың барлығы сұранысқа ие болады және ең бастысы — жұмыспен қамтылады.
— Сондай-ақ, жоба аясында біз студенттерді медициналық және педагогикалық мамандықтар бойынша оқытуға гранттар бөлеміз. Биыл біз 25 грант бойынша студенттерді ветеринария және мал шаруашылығы бағыты бойынша оқытатын боламыз. Бұл мамандар облыста жетіспейді. Жалпы, бүгінде жоғары білім мен ТжКБ жүйесіне қомақты қаржы салынды. Нәтижесінде факультеттер, ғылыми зертханалар, құзыреттілік орталықтары ашылды, жатақханалар салынуда. Біз «Білікті маман» жобасын одан әрі дамытатын боламыз. Келесі жылы гранттар санын 50 орынға көбейтеміз, — деп атап өтті бұл орайда Даниал Ахметов.
Сөз орайында айта кетелік, ҚР Президентінің тапсырмасына сәйкес, елімізде мемлекеттік білім беру тапсырысының көлемін ұлғайту жоспарланған. 2022-2023 жаңа оқу жылына грант саны 5 мыңға артатын болады. Жалпы көлемі 61 мың гранттан асады. Қаражат көзі республикалық бюджеттен қарастырылады. Бұл тұрғыда Респубикалық бюджеттен қаражат бөлу мәселесі бойынша барлық жұмыстар аяқталды. Соған сәйкес, тиісті қаулы шығарылады.
Бұл ретте айта кету керек, мемлекеттік білім беру тапсырысының басым бөлігін техникалық мамандықтарға бөлу жоспарланып отыр. Осыған дейін техникалық мамандықтарға бөлінетін грант санының үлесі 40 пайыздан асатын болса, енді оның көлемін 60 пайызға жеткізу көзделіп отыр.
Азамат ЕРСАЙЫН,
«Семей таңы»
