«ТАЗА СЕССИЯ» АКЦИЯСЫ БАСТАУ АЛДЫ
«AMANAT» партиясы жанындағы «Jas Otan» жастар қанатының Шығыс Қазақстан облыстық филиалының ұйымдастыруымен «Таза сессия» акциясы бастау алды.
Акция Семей қаласының Шәкәрім атындағы университетінде өткізлді.
Мақсаты – студент жастар бойында сыбайлас жемқорлыққа қарсы мәдениетті қалыптастыру арқылы жоғары оқу орнындағы сыбайлас жемқорлық фактілерін анықтау.
Акцияға «Семей – Адалдық алаңы» жобалық кеңсесінің жетекшісі, Семей қалалық мәслихатының депутаттары және Жастарды қолдау кеңесінің мүшелері қатысты. Еліміздің әр өңірінде өтіп жатқан шара барысында студент жастар арасында анонимді түрде сауалнамалар жүргізілуде.
– Осындай акциялар жастар бойында сыбайлас жемқорлыққа қарсы мәдениетті қалыптастыруға ықпал етеді деген ойдамыз, – дейді «AMANAT» партиясы жастар қанатының ШҚОФ төрағасы Айтмұқаш Алмас.
Жыл көлемінде екі рет ұйымдастырылатын «Таза сессия» акциясы жастардың бойында адалдықты, жауапкершілік пен адамгершілікті қалыптасыратыны анық.
Семей қаласының Жастарды қолдау кеңесінің төрағасы Алиби Абураимов:
– Студенттердің көпшілігі сыбайлас жемқорлыққа қатысты жағдай туралы айтудан бас тартады. Себебі оқудан шығарып тастайды немесе оқытушылар сессия кезінде құлатып тастайды деп қорқады. Ал сауалнама анонимді түрде боғандықтан сыбайлас жемқорлық көріністері туралы ашық жазуға мүмкіндіктері бар, – дейді.
Аталған акцияны жасотандықтар өңіріміздің басқа да жоғары оқу орындарында өткізіп жатыр.
«СТ» – ақпарат
