ӨТІНІШТЕР НАЗАРДАН ТЫС ҚАЛМАЙДЫ
Облыс әкімі Даниал Ахметов жуырда азаматтарды жеке мәселелері бойынша қабылдап, тиісті мемлекеттік құрылымдарға бірқатар тапсырмалар берді.
Бұл туралы аймақ басшысы өзінің әлеуметтік желідегі жеке парақшасында жазды.
Қабылдауға келген жергілікті тұрғын Сәуле Байырова Өскемен қаласында уақытша тұратын баспанаға мұқтаж екендігін айтады. Өйткені оның баласы көру жүйкесінің атрофиясы себебінен қайтадан операция жасау үшін үнемі нейрохирургтің бақылауында болуы тиіс екен. Сондықтан облыс орталығында болуы қажет.
Осы ретте аймақ басшысы Даниал Кенжетайұлы 11 сәуірге дейін «Үлбі» әлеуметтік орталығында бүкіл отбасын орналастыру мүмкіндігін қарастыруды тапсырды.
Ал облыс әкімінің қабылдауына жазылғандардың бірі жергілікті қаламгер Серік Құсанбаев өзінің авторлық екі томдық кітабын таратуға қатысты өтініш білдірді. Бұл ретте оған бірінші кезекте кітапханалар арқылы жұмыс істеу керектігі айтылды, осыдан соң қажетті көмек көрсетіледі.
Облыс әкімі қабылдауда болған «Арт спорт» бағдарламасы бойынша қызмет көрсетушілердің өкілі Жанна Чепрасовамен сындарлы сұхбат өткенін айтады. Сұхбат барысында аймағымыздағы мектеп жасындағы балалар мен жасөспірімдер айналысатын барлық мәдени-спорт секцияларына жан-жақты талдау жасалатыны туралы сөз қозғалды. Аталмыш салаға алдағы уақыттарда да кеңінен көңіл бөлінетін болады. Бұл дегеніміз педагогикалық білімі бар кәсіби жаттықтырушылармен және қажетті жабдықтармен қамтамасыз етіліп, толық мемлекеттік бақылау жасалады деген сөз.
Сонымен қатар Даниал Кенжетайұлына кезекті рет Глубокое ауданынан келген Тарасовтар жүгінді. Бұл ретте қабылдауға қатысқан адвокаттар алқасының өкілдері ерлі-зайыптыларға ҚР-ның барлық заңдарын сақтай отырып, құқықтық алаңда әрі қарай әрекет ету мүмкіндігін түсіндірді.
Аймақ басшысының қабылдауына келген барлық азаматтарға заң аясында жауаптар берілді. Олардың орындалуы тиісті мемлекеттік құрылымдардың бақылауында болады.
Азамат ЕРСАЙЫН,
«Семей таңы»
БІЗДІ ӘЛЕУМЕТТІК ЖЕЛІЛЕРДЕН ОҚЫҢЫЗ!
