АУЫЛ ШАРУАШЫЛЫҒЫ: АЙМАҒЫМЫЗ АЛДЫҢҒЫЛАР ҚАТАРЫНДА
Шығыс Қазақстан облысы республикадағы ауыл шаруашылығы ұйымдарының саны бойынша үздіктер қатарына кіреді. Бұл ретте облысымыз еліміздегі алдыңғы қатарлы аграрлы аймақтар Қостанай мен Павлодар облыстарынан алда келеді.
Облысымызда ауыл шаруашылығы саласын дамытуға ерекше көңіл бөлініп отыр, Кәсіпкерлікті дамыту бағдарламалары мен басқа да түрлі жобалардың сәтті іске асырылуы да облыстың үздіктер қатарынан көрінуіне ықпал етіп отыр. Жергілікті шаруалар да мемлекет қолдауын нақты сезінуде.
Мәселен, өткен жылы облыста агроөнеркәсіптік кешеннің 28 жаңа жобасы іске асырылды. Тіпті елдегі эпидемиологиялық ахуал нашарлаған кезде де өңір аграршылары ауыл шаруашылығының жалпы өнімін 4 пайызға өсіре алды.
2021 жылдың қорытындысы бойынша аймағымызда дәнді дақылдардың түсімі 12 пайызға жуық өсті, ал майлы дақылдардың жалпы түсімі 9,4 пайызға артты. Бұл ретте облысымыз күнбағыс, соя дақылдарын өсіруде ел көлемінде алдыңғы орыннан түспей келеді.
Сонымен қатар суару жүйелерін салу бойынша 2,8 млрд теңгеге 5 ірі жоба іске асырылды. Өсімдік майын өндіретін май экстракциялық зауыт іске қосылды, тағы бір май экстракциялық кешеннің құрылысы аяқталу сатысында. Шетелге өсімдік майын экспорттау ісі кеңінен жолға қойылған.
Сондай-ақ 7 мың бас ірі қара малға арналған үш бордақылау алаңының құрылысы аяқталуда. Асыл тұқымды мал өсіретін шаруаларға мемлекет тарапынан қолдау көрсетіліп, оңтайлы жағдай жасалуда.
Ал жаңадан мал бордақылау алаңдарын ашу, ет өңдейтін кәсіпорындарды іске қосу өңделген ауыл шаруашылығы өнімдерінің экспортын 4 есеге арттыруға мүмкіндік береді.
Әлібек КЕМЕЛХАН,
«Семей таңы»
БІЗДІ ӘЛЕУМЕТТІК ЖЕЛІЛЕРДЕН ОҚЫҢЫЗ!
