САЯЖАЙЛАРДЫ ЖАРЫҚТАНДЫРУ ӘКІМ НАЗАРЫНДА
Өткен аптаның соңында облыс әкімі Даниал Ахметов Өскемен және Семей қалаларының әкімдерімен, облыстық энергетика және ТКШ басқармасының өкілдерімен адамдар тұрақты негізде тұратын бау-бақша және саяжай серіктестіктерін электрмен жабдықтау мәселесі жөнінде кеңейтілген кеңес өткізді.
Жиын барысында аймақ басшысы бау-бақша және саяжай серіктестіктерін электрмен жабдықтауда бірқатар өзекті мәселелер барын және де олардың жылдан-жылға жалғасып келе жатқанын атап өтті.
– Расында, осынау проблема жыл сайын жүйелі түрде туындайды, жеке тұлғалар электр берудің әуе желілерін жүргізуге 600 миллион теңге бөле алмайтынын да түсінеміз. Атап айтар болсақ, облыс орталығы Өскеменде адамдардың көбі «Рауан», «Звездный» және «Светоч» бақша серіктестіктерінде тұрады. Олардың ішіндегі ең ірісін үздіксіз электрмен жабдықтау мәселесін біз биылғы жылы, қалған екеуін келесі жылы шешеміз, – деді аймақ басшысы Даниал Кенжетайұлы.
Ал Семейге келетін болсақ, ондағы саяжай серіктестіктерінде 19 мың адам тұрақты тұрады екен. Облыс әкімі Даниал Ахметов айтып өткендей, бүгінгі таңда Семей қаласының іргесінде орын тепкен Восточный, Водный және Восход шағын аудандарында сумен жабдықтау проблемасы бар.
– Екі шағын ауданда қазір мектептер салынып жатыр, сондықтан су мәселесі шешілді, энергия тапшылығына келсек, адамдардың жайлы тұруы үшін не істеу керектігін анықтап, егжей-тегжейлі есептеу керек, – деді бұл орайда Даниал Ахметов.
Айт кетерлігі, бұл проблемаларды шешу біраз уақыт алады әрі біршама күш салуды талап етеді. Аталған мәселелер облыс әкімінің назарында ұсталмақ.
Азамат ЕРСАЙЫН,
«Семей таңы»
БІЗДІ ӘЛЕУМЕТТІК ЖЕЛІЛЕРДЕН ОҚЫҢЫЗ!
