Облыс әкімі Даниал Ахметов өңірде төрт шағын жинақталған мектеп салу мәселесі бойынша арнайы кеңес өткізді. Жиын барысында аталмыш тарапта туындаған бірқатар өзекті мәселелер ортақ талқыға салынды.
Аймағымыздағы Күршім ауданының Ұрынхай, Жалаңашкөл, Жарма ауданының Қапай батыр ауылында жүз орындық және Бесқарағай ауданының Жыланды кентінде 50 орындық білім беру мекемелері салынбақ. Облыс әкімі атап өткендей, барлық мектептер толықтай офф-тейк келісімшарттар бойынша салынады, бірінші кезең бірнеше аптадан кейін басталады, бірақ құрылыс басталғанға дейін мектеп директорлары заманауи білім беру стандарттарына толық сәйкес болу үшін жобалармен танысуы тиіс. Аудан әкімдері де бұл мәселені бақылауда ұстауы керек.
Сонымен қатар жиында облыстық құрылыс басқармасы басшысының орынбасары есеп берді. Есепті тыңдай келе аймақ басшысы Даниал Кенжетайұлы жүргізіліп жұмыстарға байланысты пікірін білдірді.
— Өкінішке орай, қазір студенттік кезеңнен кейін бірден орынбасар лауазымына отырады деген үрдіс бар. Әрине, тәжірибе қажет. Сондықтан бір ай ішінде құрылыс, жолаушылар көлігі және автомобиль жолдары басқармалары басшыларының орынбасарлары кабинеттен тыс жұмыс істейтін болады — салынып жатқан объектілер мен жөнделіп жатқан жолдардағы учаскелердің шеберлері болады. Бұл қажетті өндірістік базаны беріп қана қоймай, мердігерлік ұйымдардың қызметіне бақылауды күшейтуге мүмкіндік беретінін атап өткім келеді, — деді өз сөзінде облыс әкімі Даниал Кенжетайұлы.
Аталмыш бағытта қолға алынған жұмыстар алдағы уақыттарда да талқыланып, кедергілер мен жетістіктер сарапталатын болады. Ал жаңадан бой көтеретін төрт шағын жинақталған мектептердің құрылысы аймақ басшысының тұрақты назарында болады.
Динара НҰРЛЫБЕКҚЫЗЫ,
«Семей таңы»
БІЗДІ ӘЛЕУМЕТТІК ЖЕЛІЛЕРДЕН ОҚЫҢЫЗ!
