Қазақстандық ALTAI MAI компаниясы Өскеменде құны 12,7 млрд теңге болатын мультидақылды май экстракциялық зауытының құрылысын бастады. Бұл туралы KAZAKH INVEST ұлттық компаниясы хабарлады.
Кәсіпорын жылына 75 мың тоннаға дейін өсімдік майын және 64 мың тонна күнжара өндіретін болады. Өндіріс алаңы шамамен 10 гектарды құрайды.
Жоба шикізатты қабылдаудан бастап дайын өнімді жөнелтуге дейінгі барлық өндіріс процесін жоғары автоматтандыруды көздейді.
— ALTAI MAI компаниясы шикізаттың үздіксіз жеткізілуіне және зауыттың техникалық мүмкіндіктеріне сенімді — кәсіпорын тәулігіне 500 тоннадан астам күнбағыс тұқымын немесе 400 тонна рапсты өңдей алады. Қайта өңдеу үшін шикізат ретінде пайдаланылатын күнбағыс және рапс алқаптарының тұқымдары зауытқа облыстың Өскемен, Бородулиха, Шемонаиха, Глубокое, Зырян, Самар және Ұлан аудандарынан түсетін болады, — деп хабарлады KAZAKH INVEST.
Май экстракциялық зауыттар болашақта импортты алмастыру мәселесін оң шешуге, сондай-ақ Қытайға, Өзбекстанға және басқа елдерге экспортталатын тауар көлемін ұлғайтуға ықпал етпек.
Айта кетер болсақ, бұған дейін Шығыс Қазақстан облысының әкімі Даниал Ахметов фермерлерді майлы дақылдар алаңын ұлғайтуға шақырған болатын. Бұл дақылдарға өңірде 484,7 мың гектар жер қарастырылған.
«СТ» — ақпарат
БІЗДІ ӘЛЕУМЕТТІК ЖЕЛІЛЕРДЕН ОҚЫҢЫЗ!
