Шығыс Қазақстан облысының әкімі Даниал Ахметов аймағымыздағы қалалар мен аудандарға жұмыс сапарын жалғастыруда. Даниал Кенжетайұлы аудан басшыларының есебін тыңдап, өңірлердегі өзекті мәселелерді жергілікті жұртшылықпен бірлесіп талқылауда. Жұмыс сапары барысында облыс басшысы сонымен қатар өнеркәсіп орындары мен шаруашылықтарды аралап, тыныс-тіршілігімен танысуда.
Аймақ басшысы Даниал Кенжетайұлы ауыл шаруашылығы қарқынды дамып келе жатқан Ұлан ауданында болып қайтты.
Облыс әкімі бірінші кезекте жергілікті шаруа қожалықтарының жұмысына назар аударды. Мұндағы «Багратион» және «Украинка» шаруашылықтарында әрқайсысы 600 басқа арналған екі роботтандырылған сүт-тауар фермасының құрылысы жүріп жатыр. Ауданның аграршылары картоп өсіру бойынша тамаша жоба әзірледі, алаңдар мен тұқым қоры дайындалды. 9,8 мың гектар жайылымдық жерлер қайтарылған.
Ауданның шаруа қожалықтарының басшылары бизнестің әлеуметтік жауапкершілігінің жақсы үлгісін көрсетіп отыр, олар жолдарды жөндеп, жас мамандарға арналған пәтерлер мен ауылдық клубтарды салуда және қалпына келтіруде.
Бұрынғы аудан орталықтарын дамыту бағдарламасы бойынша қолға алынған Таврия мен Бозанбайда дене шынықтыру-сауықтыру кешендерінің құрылысы аяқталуда, жолдар асфальтталған. Облыс әкімімен жүздесу барысында аудандағы орталық қазандықтың қуатын күшейту туралы ұсыныс айтылды, өйткені әлеуметтік нысандар қазір электрмен жылытылады, бұл өте қымбатқа түсуде.
— Қасым Қайсенов кентінің тұрғындары үшін аурухана құрылысына жобалық-сметалық құжаттың дайындығы жақсы жаңалық болды, мектеп осы жылы оқушыларды қабылдауға дайын болады. Ал келесі жылы кенттегі жылумен жабдықтау желілерін жөндеуді бастаймыз, — деп атап өтті облыс әкімі Даниал Ахметов.
Аймақ басшысы бүгінгі таңда Ұлан ауданында атқарылып жатқан жұмыстар мен өңір экономикасын дамыту бағытындағы шараларға оң баға берді.
Қ.ӘЛІМБЕК,
«Семей таңы»
