ДАРЫНДЫ ӨРЕНДЕРГЕ ҚОЛДАУ КӨП
Облыс әкімі Даниал Ахметов оқуда, шығармашылықта және спортта жоғары жетістіктере жеткен дарынды оқушылармен және студенттермен кездесті.
Кездесуге халықаралық, республикалық зияткерлік олимпиадалар мен шығармашылық конкурстардың, спорт жарыстарының жеңімпаздары шақырылды.
Дөңгелек үстел басында еркін әңгіме түрінде өткен шарада Даниал Кенжетайұлы дарынды жастар кез келген мемлекеттің мақтанышы және болашақ олардың білімі мен жаңа идеяларына байланысты екенін, ал балалардың жетістіктері облыстың имиджі мен беделін қалыптастыратынын атап өтті.
Оқушылар өз кезегінде жетістіктері мен табыстары туралы айтты. Алған әсерлерімен бөлісіп, жасалып жатқан жағдайлар үшін облыс басшысына алғыстарын білдірді және өздеріне артылған үмітті ақтау үшін аянбай білім алып, еңбектенуге уәде етті.
Кездесу аясында республикалық және халықаралық шығармашылық конкурстардың жүлдегерлерінің шығармашылық жұмыстарының көрмесі ұйымдастырылды.
Кездесу соңында дарынды балаларға облыс әкімінің атынан грамоталар мен 100 мың теңге көлеміндегі ақшалай сертификаттар табыс етілді.
Әлібек КЕМЕЛХАН,
«Семей таңы»
