Шығыс Қазақстан облысындағы барлық әлеуметтік нысандарда 1 тамызға қарай көмірдің жүз пайыздық қоры болуы тиіс.
Бұл туралы аймақ басшысы Даниал Ахметов жылыту маусымына дайындық мәселесі бойынша қала және аудан әкімдерімен, басқарма басшыларымен өткен кеңесте айтты.
Айта кетерлігі, биыл Өскемен қаласының әкімі бірқатар шағымдар мен ескертулер алған болатын. Сондай-ақ шұғыл түрде Риддер жылу электр орталығымен жұмыс істеуге тура келді. Облыс әкімі мұндай жағдайлар алдағы уақытта қайталанбауы керектігін баса айтты.
Аймақ басшысы әрбір әкімге көмірді жеткізу, жөнелту мерзімдері мен отын мөлшері ескерілетін барынша нақты кесте жасауды тапсырды. Сондай-ақ сату нүктелерінің жұмысын тексеру және осы тізбектен алыпсатарларды (бұл әсіресе шалғай аудандарға қатысты) алып тастау қажеттігін ескертті.
1 тамызға қарай біздің облыстың әлеуметтік нысандарында көмірдің жүз пайыздық қоры болуға тиіс, ал 1 қыркүйекке қарай қалалар мен аудандардың жылумен жабдықтау жүйелеріндегі барлық жөндеу жұмыстарын аяқтау қажет.
Аймақ басшысының осы сөзінен соң қалалар мен аудандар әкімдері өз өңірлері бойынша атқарылатын шараларды пысықтап, тапсырманы жүзеге асыруды қолға алуы тиіс. Облыс әкімінің алға қойған міндеттерінің орындалуы алдағы уақытта өткізілетін жиындар барысында жан-жақты талқыланатын болады.
Әлібек КЕМЕЛХАН,
«Семей таңы»
