ШҚО Қан орталығында тіндер мен ағзаларды иммунологиялық типтеудің жергілікті зертханасы ашылды. Бұл туралы ШҚО ӘМСҚ баспасөз қызметі мәлімдеді.
Бұл зертхананың жұмысы ағзаны ауыстыруды қажет ететін адамдарға арнайы көмекті колжетімді ете түспек.
Айта кету керек, зерттеулерді жүргізу толығымен ШҚО ӘМСҚ арқылы тегін кепілдендірілген медициналық көмек көлемі аясында қаржыландырылады және осы бағытта Қор филиалы 2022 жылға 49 млн теңге көлемінде қаражат бөлуді жоспарлап қойды.
Қазақстандағы алғашқы осындай зертхана 2010 жылы елордада трансфузиология ғылыми-өндірістік орталығының базасында құрылды.
Ағзаны ауыстыруды қажет ететін адамдарға медициналық көмектің қолжетімділігін арттыру және осал әлеуметтік санатындағы пациенттердің тұрғылықты жеріне жақындату үшін республика бойынша Алматы, Ақтөбе және Шымкент қалаларында осындай бірнеше HLA-зертханалар ұйымдастырылды.
Енді бұл жоғары мамандандырылған көмек Шығыс Қазақстан облыстық Қан орталығының базасында қолжетімді болып отыр.
Шығыс өңірінде трансплантологияны дамыту үшін тіндерді иммунологиялық типтеудің жергілікті зертханасы 133 млн теңгеден астам сомаға жоғары мамандандырылған жабдықпен жабдықталған. Орталықтың мамандары Нұр-Сұлтан және Санкт-Петербург қалаларының базасында оқытудан өтті. HLA-ны қалыптастырудың бастапқы кезеңінде ШҚО Қан орталығының зертханасы өзге әріптестерімен өзара тығыз байланыста жұмыс істейтін болады.
— Бұл зертхана донорлар мен реципиенттерді типтеуді, трансплантацияланатын ағзалар мен тіндердің үйлесімділігін анықтауды ғана емес, сондай-ақ өңірде және жалпы елде трансплантологияны дамыту бойынша бірқатар басқа да маңызды функцияларды орындайтын болады. Бірінші кезекте бұл шығыс өңірінде (алдымен Шығыс Қазақстан облысы, содан кейін Павлодар облысы) трансплантациялауды қажет ететін пациенттердің Күту парағын өзекті күйде ұстау, сондай-ақ донорлардың гемопоэздік дің жасушалары донорларының ұлттық тіркелімін дамыту және толықтыру, — деп атап өтті өз сөзінде Қан орталығының директоры Светлана Шмурыгина.
Азамат ЕРСАЙЫН,
«Семей таңы»
